ડાંગ જિલ્લા પંચાયત પ્રમુખે ગિરમાળ ગીરાધોધની મુલાકાત લીધી

આહવા : આજે રક્ષાબંધનના પાવન પર્વ પર ડાંગ જિલ્લા પંચાયતના પ્રમુખે સુબિર તાલુકાના સ્થાનિક આગેવાનો અને હોદ્દેદારો સાથે પ્રકૃતિના અદભુત આશીર્વાદ સમાન ડાંગ જિલ્લાના વિશ્વવિખ્યાત ગિરમાળ ગીરાધોધની અચાનક મુલાકાત લીધી હતી.

ચોમાસાની ઋતુમાં ગીરાધોધની નયનરમ્ય સુંદરતા માણવા માટે રાજ્યભરમાંથી મોટી સંખ્યામાં પ્રવાસીઓ ઉમટી પડે છે. આ મુલાકાત દરમિયાન જિલ્લા પંચાયત પ્રમુખે પ્રવાસીઓ તથા સ્થાનિક ગ્રામજનો દ્વારા ભોગવાતી પાયાની ભૌતિક સુવિધાઓની અછત અને સમસ્યાઓની ગંભીર નોંધ લીધી હતી.

પ્રખ્યાત પ્રવાસન સ્થળ તરીકે ગીરાધોધ ખાતે પ્રવાસીઓની સુરક્ષા, સુવિધા અને સ્થાનિક આદિવાસી સમાજની રોજગારીને ધ્યાનમાં રાખીને પ્રમુખે સ્થળ પર જઈને જમીની સ્થિતિનું સઘન નિરીક્ષણ કર્યું હતું.

અને તેમણે સ્થાનિક ગ્રામજનો સાથે સીધો સંવાદ સાધીને ખાત્રી આપી હતી કે, ડાંગના આ પ્રાકૃતિક વારસાને એક આદર્શ અને સુસજ્જ પ્રવાસન કેન્દ્ર તરીકે વિકસાવવા માટે પંચાયત અને રાજ્ય સરકાર પૂર્ણ રીતે કટિબદ્ધ છે.

આ મુલાકાત દરમિયાન જિલ્લા પંચાયત પ્રમુખે ગીરાધોધ વિસ્તારમાં નેટવર્કના અભાવે પ્રવાસીઓ અને સ્થાનિકોને સંપર્ક કરવામાં ભારે હાલાકી ભોગવવી પડે છે.

જે સમસ્યાના કાયમી ઉકેલ માટે તાત્કાલિક ધોરણે બીએસએનએલનું મોબાઇલ નેટવર્ક ઉપલબ્ધ કરાવવા, પ્રવાસન સ્થળની પ્રાકૃતિક સુંદરતા અને ગરિમા જળવાઈ રહે તે માટે યોગ્ય સ્થળોએ કચરાપેટીઓ મુકવાની અને પ્રવાસીઓની સગવડ માટે શૌચાલય-બાથરૂમ જેવી આવશ્યક ભૌતિક સુવિધાઓનું ટૂંક સમયમાં નિર્માણ કરવા ગુજરાત સરકારના પ્રવાસન મંત્રી સમક્ષ વિશેષ રજૂઆત કરી જરૂરી ગ્રાન્ટ અને પ્રોજેક્ટસ મંજૂર કરાવવામાં ખાત્રી આપી છે.

સાથે જ પ્રવાસન ક્ષેત્રના સુઆયોજિત વિકાસ દ્વારા સ્થાનિક આદિવાસી ગ્રામજનોને પોતાના ગામમાં જ રોજીરોટીના નવા સાધનો મળી રહે તેવું નક્કર આયોજન હાથ ધરાશે.

જિલ્લા પંચાયત પ્રમુખની આ સરાહનીય મુલાકાત અને તમામ સમસ્યાઓના ઝડપી નિરાકરણની ખાતરીથી સ્થાનિક ગ્રામજનો અને પ્રવાસીઓમાં ભારે આનંદની લાગણી વ્યાપી ગઈ છે.

ડાંગ જિલ્લાના પ્રવાસન ઉદ્યોગને વેગ આપવાની દિશામાં આ મુલાકાત એક મહત્વપૂર્ણ કદમ સાબિત થશે.