કચીગામમાં નવજાત શિશુનો મૃતદેહ મળી આવતા ચકચાર

દમણ : કચીગામ સ્થિત ઝરી બ્રિજ નજીક નવજાત શિશુનો મૃતદેહ મળી આવતા વિસ્તારમાં ચકચાર મચી ગઈ હતી. સ્થાનિક લોકોને મૃતદેહ નજરે પડતાં તાત્કાલિક પોલીસને જાણ કરવામાં આવી હતી. આ ઘટનાની જાણ થતાં પોલીસની ટીમ, ફાયર બ્રિગેડ અને મેડિકલ ટીમ સ્થળ પર પહોંચી હતી. જ્યાં મેડિકલ ટીમે પ્રાથમિક તપાસમાં નવજાત શિશુનો જન્મ થયાને આશરે એકથી બે દિવસ થયા હોવાનું અનુમાન વ્યક્ત કરવામાં આવ્યું છે. જોકે શિશુની ચોક્કસ ઉંમર અને મૃત્યુનું કારણ મેડિકલ તપાસ તથા રિપોર્ટ બાદ જ સ્પષ્ટ થશે.

પોલીસે મૃતદેહને કબજામાં લઈ જરૂરી કાર્યવાહી હાથ ધરી છે અને સમગ્ર મામલે તપાસ શરૂ કરી છે. નવજાત શિશુનો મૃતદેહ ઝરી બ્રિજ નજીક કેવી રીતે પહોંચ્યો તથા ઘટનામાં કોઈની સંડોવણી છે કે કેમ તે સહિતના તમામ પાસાઓની તપાસ પોલીસ દ્વારા કરવામાં આવી રહી છે.