પ્રજાપતિ વાડી પાછળ ગટરનો સ્લેબ તૂટ્યો, સ્થાનિકોમાં અકસ્માતની ભીતિ

ત્રણ મહિના બાદ પણ રિપેરિંગ નહીં; અન્ય એક સ્થળે પણ સ્લેબ નબળી હાલતમાં હોવાથી તાત્કાલિક કામગીરીની માંગ

નવસારી : નવસારીના પ્રજાપતિ વાડી પાછળ તેમજ મહિલા કોલેજના પાછળના વિસ્તારમાં કેટલાક રહેણાંક મકાનો આવેલા છે. આ મકાનો પાસેથી બોક્સ ગટર પસાર થાય છે અને સ્થાનિક રહીશો રોજિંદી અવરજવર માટે ગટર ઉપરના સ્લેબનો ઉપયોગ કરે છે. જોકે આશરે ત્રણ મહિના અગાઉ એક સ્થળે ગટર ઉપરનો સ્લેબ તૂટી જતા સ્થાનિકોમાં ગટરમાં પડી જવાના અકસ્માતની ભીતિ ઉભી થઈ છે.

આ બાબતે નવસારી મહાનગરપાલિકાને જાણ કરવામાં આવ્યા બાદ કોઈ વ્યક્તિ ગટરમાં ન પડે તે માટે સ્થળ પર બેરીકેટ મૂકવામાં આવ્યા હતા. તેમ છતાં લગભગ ત્રણ મહિના જેટલો સમય વીતી ગયો હોવા છતાં તૂટેલા સ્લેબનું રિપેરિંગ કે નવો સ્લેબ મૂકવાની કામગીરી કરવામાં આવી નથી. પરિણામે સ્થાનિક રહીશો જોખમ વચ્ચે અહીંથી પસાર થવા મજબૂર બન્યા છે.

ચિંતાજનક બાબત એ છે કે એક જગ્યાએ તૂટેલા સ્લેબનું કામ હજી સુધી પૂર્ણ થયું નથી ત્યારે ગટર ઉપર અન્ય એક સ્થળે પણ સ્લેબ તૂટવાની સ્થિતિમાં હોવાનું સ્થાનિકો જણાવી રહ્યા છે. જો કોઈ વ્યક્તિ પસાર થતી વખતે આ સ્લેબ તૂટી પડે તો ગંભીર અકસ્માત સર્જાવાની શક્યતા રહેલી છે.

સ્થાનિક રહીશોએ નવસારી મહાનગરપાલિકાના અધિકારીઓને પ્રજાપતિ વાડી પાછળના વિસ્તારની તાત્કાલિક મુલાકાત લઈ જોખમી સ્લેબનું સમારકામ કરાવવા અને સુરક્ષિત અવરજવર માટે જરૂરી કામગીરી હાથ ધરવાની માંગ કરી છે.