આહવાના પોલીસ પરેડ ગ્રાઉન્ડ ખાતે સેવા જ્યોતિ યાત્રાનો જિલ્લા કક્ષાનો કાર્યક્રમ યોજાયો

વડાપ્રધાન નરેન્દ્રભાઈ મોદીના વર્ચ્યુઅલ સંબોધન સાથે વિકસિત ભારત@૨૦૪૭ના નિર્માણ માટે સૌએ સામૂહિક સંકલ્પ લીધો

ડાંગ : સમગ્ર રાજ્યમાં ચાલી રહેલા સેવા સંકલ્પ અભિયાન-૨૦૨૬ અંતર્ગત ડાંગ જિલ્લાના મુખ્ય મથક આહવાના પોલીસ પરેડ ગ્રાઉન્ડ ખાતે રાજ્ય કક્ષાના મંત્રી રમતગમત, યુવક સેવા અને સાંસ્કૃતિક પ્રવૃતિઓ, સ્વૈચ્છિક સંસ્થાઓનું સંકલન, ઉધ્યોગ, લધુ, સૂક્ષ્મ અને મધ્યમ ઉદ્યોગ, મીઠા ઉદ્યોગ, છાપકામ અને લેખન સામગ્રી, પ્રવાસન અને યાત્રાધામ વિકાસ, નાગરિક ઉડ્ડયન વિભાગ તેમજ ડાંગના પ્રભારી મંત્રી ડો.જયરામભાઇ ગામીતની પ્રેરક ઉપસ્થિતિમાં સેવા જ્યોતિ યાત્રાના જિલ્લા કક્ષાના કાર્યક્રમનું આયોજન કરવામાં આવ્યું હતું.

પ્રભારી મંત્રીએ ડાંગ જિલ્લામાં યોજાયેલા સેવાકીય કાર્યો અને આશીર્વાદનો દીવડો જેવા કાર્યક્રમોને સફળતાપૂર્વક સંપન્ન કરવા બદલ ડાંગ જિલ્લાની સમગ્ર ટીમ, વહીવટીતંત્ર અને કાર્યકર્તાઓને અભિનંદન પાઠવ્યા હતા.

આ કાર્યક્રમ દરમિયાન વડાપ્રધાન નરેન્દ્રભાઈ મોદીના સંબોધનનું જીવંત પ્રસારણ ઉપસ્થિત સર્વેએ રસપૂર્વક નિહાળ્યું હતું. વંદે માતરમ ગાનના ૧૫૦ વર્ષ પૂર્ણ થવાના અવસરે સમૂહગાન પણ કરવામાં આવ્યું હતું. પ્રભારી મંત્રી, મહાનુભાવો અને વિશાળ સંખ્યામાં ઉપસ્થિત નાગરિકો દ્વારા વર્ષ ૨૦૪૭ સુધીમાં સક્ષમ અને સમૃદ્ધ રાષ્ટ્રના નિર્માણ અર્થે વિકસિત ભારત@૨૦૪૭નો સામૂહિક સંકલ્પ લેવામાં આવ્યો હતો.

ત્યારબાદ મહાનુભાવોના હસ્તે સેવા જ્યોતિ પ્રગટાવી યાત્રાનો પ્રારંભ કરવામાં આવ્યો હતો. જે યાત્રા પોલીસ પરેડ ગ્રાઉન્ડ થી નીકળી રંગઉપન સુધી યોજાઇ હતી. યાત્રા દરમિયાન સ્થાનિક ગ્રામજનો અને વેપારીઓએ ઉમળાકાભેર યાત્રીઓનું સ્વાગત કર્યું હતું.

આ ઉપરાંત કાર્યક્રમ સ્થળે રાષ્ટ્ર કે રંગ, સેવા કે સંગ અન્વયે આયોજિત રંગોળી અને કોલાજ વર્ક સ્પર્ધામાં વિજેતા કૃતિઓને સન્માનિત કરવામાં આવી હતી.