ડાંગ જિલ્લા પોલીસે ‘રન ફોર ડ્રગ ફ્રી ડાંગ’ના સૂત્ર સાથે જનજાગૃતિ દોડ યોજી

ગાંધી જયંતિ નિમિત્તે નશામુક્તિનો સંદેશ આપવા નાગરિકો, વિદ્યાર્થીઓ અને પોલીસ કર્મીઓ જોડાયા; વિજેતાઓને ટ્રોફી આપી સન્માનિત કરાયા

ડાંગ : રાષ્ટ્રપિતા મહાત્મા ગાંધીજીની જન્મજયંતિ નિમિત્તે સેવા સંકલ્પ કાર્યક્રમ અંતર્ગત ડાંગ જિલ્લા પોલીસ દ્વારા નશામુક્તિ અંગે જનજાગૃતિ ફેલાવવા ‘રન ફોર ડ્રગ ફ્રી ડાંગ’ના સૂત્ર સાથે દોડનું આયોજન કરવામાં આવ્યું હતું.

ડાંગ જિલ્લા પોલીસ અધિક્ષકની કચેરી ખાતે ગુજરાત વિધાનસભાના નાયબ મુખ્ય દંડક વિજયભાઈ પટેલ, જિલ્લા પંચાયત પ્રમુખ રાજેશભાઈ ગામિત અને જિલ્લા પોલીસ વડા પૂજા યાદવ સહિતના મહાનુભાવોએ દોડને લીલી ઝંડી આપી પ્રસ્થાન કરાવ્યું હતું.

આ દોડમાં વિવિધ વયજૂથના નાગરિકો, યુવાનો, વિદ્યાર્થીઓ, રમતવીરો તેમજ પોલીસ અધિકારીઓ અને કર્મચારીઓએ ઉત્સાહભેર ભાગ લીધો હતો. દોડ પૂર્ણ થયા બાદ પોલીસ કર્મીઓ, મહિલાઓ અને વિદ્યાર્થીઓની શ્રેણીઓમાં પ્રથમ ત્રણ ક્રમે આવનાર સ્પર્ધકોને ટ્રોફી આપી સન્માનિત કરવામાં આવ્યા હતા.

આ પ્રસંગે જિલ્લા પોલીસ અધિક્ષક પૂજા યાદવે જણાવ્યું હતું કે યુવા પેઢીને નશાના વ્યસનથી દૂર રાખવા સતત જનજાગૃતિ અને સામૂહિક પ્રયાસો જરૂરી છે. તેમણે ઉપસ્થિત સૌને નશામુક્ત સમાજ અને સુરક્ષિત ભવિષ્યના નિર્માણ માટે સક્રિય સહયોગ આપવા તથા આ સંદેશને જનજન સુધી પહોંચાડવાની અપીલ કરી હતી.