ડાંગ સહિત સમગ્ર ગુજરાતમાં વનરક્ષકો અને વનપાલો દ્વારા આંદોલનની ચીમકી

પડતર પ્રશ્નોના નિરાકરણ માટે આવેદનપત્ર પાઠવ્યું

ડાંગ : વનરક્ષક અને વનપાલ કર્મચારીઓના લાંબા સમયથી પડતર પ્રશ્નોનો કોઈ સંતોષકારક ઉકેલ ન આવતા વન વિભાગના કર્મચારીઓમાં ભારે અસંતોષ વ્યાપી ગયો છે. આ અસંતોષના પગલે ગુજરાત રાજ્ય વન રક્ષક કર્મચારી મંડળ દ્વારા ગત ૨૮મી સપ્ટેમ્બરે ગાંધીનગર ખાતે આવેદનપત્ર પાઠવીને જો વહેલી તકે માંગણીઓ સ્વીકારવામાં નહીં આવે તો ઉગ્ર આંદોલનની ચીમકી ઉચ્ચારવામાં આવી છે.

ગત ૩જી ઓક્ટોબરના રોજ ડાંગ જિલ્લા વનરક્ષક કર્મચારી મંડળ દ્વારા ડાંગ ઉત્તર અને ડાંગ દક્ષિણ વન વિભાગના ડી.સી.એફ.ઓને આવેદનપત્ર પાઠવવામાં આવ્યું હતું. જેમાં મુખ્ય અને મહત્વની માંગણીઓ કરી છે કે, વનરક્ષક અને વનપાલ કર્મચારીઓને સુરક્ષા અને સિક્યુરિટી એલાઉન્સ આપવામાં આવે, રજાના દિવસે ફરજ બજાવવાની મર્યાદા વાર્ષિક 48 દિવસની જગ્યાએ પૂરેપૂરી આપવામાં આવે, રજા પગારનું ચૂકવણું બેઝિક અને ડી.એ. મુજબ પોલીસ વિભાગના ધારા-ધોરણો અનુસાર કરવામાં આવે, વર્ગ-4ના રોજમદારને ૨૧,૯૦૦ અને વર્ગ-3ના વનરક્ષકને ૧૮,૦૦૦ ગ્રેડ-પેની વિસંગતતા દૂર કરી યોગ્ય વેતન ધોરણ લાગુ કરવામાં આવે, વનપાલની બંધ કરવામાં આવેલ ભરતી અને જગ્યાઓનું મહેકમ પુનઃ ચાલુ કરી, રાઉન્ડ, બીટ તથા રેન્જનું વિસ્તરણ કરીને નવી જગ્યાઓ ઊભી કરવામાં આવે, વનરક્ષક અને વનપાલની લાંબા સમયથી પ્રતિક્ષિત બદલીના પ્રશ્નોનું તાત્કાલિક નિરાકરણ લાવવું, તા. ૦૧/૧૦/૨૦૨૨થી બાકી રહેલો રજા પગાર તાત્કાલિક ચૂકવવો, વનરક્ષક ભરતી-૨૦૨૨ના કર્મચારીઓનું ૧૪ માસનું બાકી વોશિંગ એલાઉન્સ ચૂકવવું, વનરક્ષક ભરતી ૨૦૨૨ અને ૨૦૨૪ અંતર્ગત ૬ મહિનાની તાલીમ પૂર્ણ કરીને આવેલા વનરક્ષકોના બાકી રહેતા ટી.એ./ડી.એ. બિલોનું તાત્કાલિક ચૂકવણું કરવું, જંગલમાં સતત પેટ્રોલિંગ કરતા વનરક્ષકો અને વનપાલોને પેટ્રોલ એલાઉન્સ આપવામાં આવે, કર્મચારીઓને ગુણવત્તાયુક્ત અને બ્રાન્ડેડ ડ્રેસ આર્ટિકલ્સ તેમજ જરૂરી સાધનો સમયસર પૂરા પાડવામાં આવે તેવી માંગણીઓ કરવામાં આવી છે.

જો તેમની માંગણીઓનો તાત્કાલિક ધોરણે ઉકેલ નહીં આવે, તો ડાંગ સહિત સમગ્ર ગુજરાતમાં આંદોલન વધુ ઉગ્ર બનાવી હડતાળનો માર્ગ અપનાવવાની ચીમકી ઉચ્ચારી છે. ત્યારે વન વિભાગના કર્મચારીઓની આ રોષે ભરાયેલી માંગણીઓ આગામી દિવસોમાં સરકાર માટે મોટો પડકાર બની શકે તેમ છે.