ડાંગમાં ભગવાન બીરસા મુંડા જનજાતીય ગૌરવ પરિવહન સેવા અંતર્ગત વધુ ૭ બસોનું લોકાર્પણ

આહવા ખાતે ધારાસભ્ય વિજયભાઈ પટેલે બસોને લીલી ઝંડી આપી; અંતરિયાળ ગામોના મુસાફરોને પરિવહનની વધુ સારી સુવિધા મળશે

ડાંગ : ડાંગ જિલ્લાના જનજાતિ વિસ્તારોમાં પરિવહન સુવિધાને વધુ સુલભ અને સશક્ત બનાવવા ભગવાન બીરસા મુંડા જનજાતીય ગૌરવ પરિવહન બસ સેવા અંતર્ગત ગુજરાત રાજ્ય માર્ગ પરિવહન નિગમની વધુ ૭ નવી બસોનું આહવા ખાતે લોકાર્પણ કરવામાં આવ્યું હતું.

આ પ્રસંગે મુખ્ય મહેમાન તરીકે ઉપસ્થિત ગુજરાત વિધાનસભાના નાયબ મુખ્ય દંડક તથા ડાંગના ધારાસભ્ય વિજયભાઈ પટેલના હસ્તે બસ સેવાનું લોકાર્પણ કરવામાં આવ્યું હતું. કાર્યક્રમમાં જિલ્લા પંચાયત પ્રમુખ રાજેશભાઈ ગામીત, ડાંગ જિલ્લા ભાજપા પ્રમુખ સુરેશભાઈ ચૌધરી, ડેપો મેનેજર ગૌસ્વામી સહિત આગેવાનો, પદાધિકારીઓ અને મહાનુભાવો ઉપસ્થિત રહ્યા હતા.

આ પ્રસંગે મહાનુભાવોએ જણાવ્યું હતું કે ભગવાન બીરસા મુંડાના નામે શરૂ કરવામાં આવેલી આ બસ સેવા આદિજાતિ વિસ્તારોના લોકો માટે શિક્ષણ, આરોગ્ય, રોજગાર અને અન્ય આવશ્યક સેવાઓ સુધીની પહોંચ સરળ બનાવવામાં મહત્વપૂર્ણ સાબિત થશે. નવી બસોના પ્રારંભથી જિલ્લાના અંતરિયાળ ગામોના મુસાફરોને સુરક્ષિત, આરામદાયક અને સમયસર પરિવહન સુવિધા ઉપલબ્ધ થશે.

કાર્યક્રમ દરમિયાન મહાનુભાવોએ નવી બસોને લીલી ઝંડી બતાવી પ્રસ્થાન કરાવ્યું હતું. મુસાફરોને વધુ સારી અને ગુણવત્તાસભર સેવા પૂરી પાડવા માટે નિગમ દ્વારા કરવામાં આવતા પ્રયાસોની પ્રશંસા કરી હતી. સાથે જ ઉપસ્થિત મહાનુભાવોએ આ બસોમાં પ્રતીકાત્મક મુસાફરી પણ કરી હતી.