નવા આઈકોનીક છાપરા-નવસારી રોડ પર ડ્રેનેજના ઢાંકણ બેસી જતા અકસ્માતનો ભય

મનપાએ ચેતવણી બોર્ડ કે બેરિકેડ ન મૂકતા વાહનચાલકોમાં રોષ, રસ્તાની દેખરેખ સામે ઉઠ્યા સવાલો

નવસારી : નવસારીના નવા આઈકોનીક છાપરા-નવસારી રોડ પર રસ્તાની વચ્ચોવચ આવેલી ડ્રેનેજના ઢાંકણ બેસી જવાથી ખાડા જેવી પરિસ્થિતિ સર્જાઈ છે. મનપા દ્વારા ત્યાં ચેતવણી બોર્ડ કે બેરિકેડ ન મૂકાતા વાહનચાલકોમાં અકસ્માતનો ભય અને ભારે રોષ જોવા મળી રહ્યો છે.

નવસારીથી છાપરા ચોકડી સુધીનો રસ્તો પહોળો કરી આઈકોનીક રોડ તરીકે વિકસાવવામાં આવ્યો છે. રોડની વચ્ચે ડિવાઈડર બનાવી છોડ રોપીને સુંદરતા વધારવામાં આવી છે. જોકે રસ્તાની વચ્ચેથી પસાર થતી ડ્રેનેજ લાઈનના ઢાંકણ રસ્તાના લેવલથી નીચે રહી જતા વાહનોની સતત અવરજવરથી કેટલીક જગ્યાઓ બેસી ગઈ છે અને ખાડા જેવી સ્થિતિ ઉભી થઈ છે.

વરસાદી માહોલમાં રસ્તા પર પાણી ભરાતા આ બેસી ગયેલી જગ્યાઓ વાહનચાલકોને સહેલાઈથી દેખાતી નથી. પરિણામે વાહનોને અચાનક આંચકો લાગવો અને અકસ્માત સર્જાવાનો ભય રહે છે. કેટલાક ડ્રેનેજના ઢાંકણો તૂટેલી હાલતમાં હોવાનું પણ સામે આવ્યું છે.

સ્થાનિક વાહનચાલકોનો આક્ષેપ છે કે લાંબા સમયથી સમસ્યા હોવા છતાં તેનું યોગ્ય નિરાકરણ કરવામાં આવ્યું નથી. આ મુખ્ય માર્ગ પરથી દરરોજ મોટી સંખ્યામાં નાના-મોટા વાહનો પસાર થતા હોવાથી મનપા દ્વારા તાત્કાલિક મરામત કરવામાં આવે અથવા ત્યાં બેરિકેડ અને ચેતવણી બોર્ડ મૂકવામાં આવે તેવી માંગ ઉઠી રહી છે.

એક વાહનચાલકે રસ્તાની સ્થિતિના ફોટા સોશિયલ મીડિયામાં શેર કરીને છેલ્લા છ મહિનાથી કેટલીક ચેમ્બરો બેસી ગયેલી હોવાનો આક્ષેપ કર્યો હતો. ફરિયાદો છતાં ઉકેલ ન આવ્યો હોવાની સાથે જરૂરી માર્ગ મરામતને પ્રાથમિકતા આપવા માંગ કરવામાં આવી છે.

રસ્તા પરના ખાડાઓ અકસ્માત માટે ગંભીર જોખમ બની શકે છે. તેથી નવા આઈકોનીક રોડની દેખરેખ, ડ્રેનેજ ચેમ્બરોની મરામત અને વાહનચાલકોની સલામતી માટે નવસારી મહાનગરપાલિકા દ્વારા તાત્કાલિક પગલાં લેવામાં આવે તેવી માંગ થઈ રહી છે.