મરોલી-ઉભરાટ રોડ પર મોપેડમાં વિદેશી દારૂ લઈ જતી યુવતીનો વીડિયો વાયરલ, માતા-પુત્રી ઝડપાઈ

મરોલી પોલીસે ₹14,400ની 96 બોટલ અને મોપેડ સહિત ₹64,400નો મુદ્દામાલ કબજે કર્યો; એક મહિલા વોન્ટેડ

પોલીસ તપાસ દરમિયાન મોપેડના આગળના ભાગમાંથી આશરે ₹14,400ની કિંમતની વિદેશી દારૂની કુલ 96 બોટલો મળી આવી હતી. પોલીસે અંદાજે ₹50 હજારની મોપેડ સહિત કુલ ₹64,400નો મુદ્દામાલ કબજે કર્યો હતો. આ કેસમાં દિપલા ગામે રહેતી રેણુકાબેનને વોન્ટેડ જાહેર કરી આગળની કાયદેસરની કાર્યવાહી હાથ ધરવામાં આવી છે.

નવસારી : મરોલી-ઉભરાટ રોડ પર મોપેડમાં વિદેશી દારૂનો જથ્થો લઈ જતી એક યુવતીનો વીડિયો સ્થાનિકોએ બનાવી સોશિયલ મીડિયામાં વાયરલ કર્યો હતો. વીડિયો સામે આવ્યા બાદ મરોલી પોલીસે મોપેડની નંબર પ્લેટના આધારે તપાસ હાથ ધરી બોરસી-માછીવાડ ગામે મોપેડ માલિકના ઘરે છાપો મારી માતા-પુત્રીને ઝડપી પાડી હતી. પોલીસે ₹14,400ની કિંમતનો વિદેશી દારૂ અને મોપેડ સહિત કુલ ₹64,400નો મુદ્દામાલ કબજે કર્યો હતો, જ્યારે અન્ય એક મહિલાને વોન્ટેડ જાહેર કરી વધુ તપાસ હાથ ધરી છે.

મળતી માહિતી મુજબ, મરોલી-ઉભરાટ રોડ પરથી એક યુવતી મોઢા પર ઓઢણી બાંધી મોપેડ નં. GJ-21-DE-5952 પર જઈ રહી હતી. મોપેડના આગળના ભાગમાં રાખેલી થેલી અંગે કેટલાક સ્થાનિકોને શંકા જતા તેમણે યુવતીને રોકી તપાસ કરતાં તેમાં ભારતીય બનાવટનો વિદેશી દારૂ મળી આવ્યો હોવાનું સામે આવ્યું હતું. સ્થાનિકોએ આ ઘટનાનો વીડિયો સોશિયલ મીડિયામાં વાયરલ કરતા પોલીસ હરકતમાં આવી હતી.

વાયરલ વીડિયોમાં દેખાતી મોપેડની નંબર પ્લેટના આધારે પોલીસે તપાસ શરૂ કરી હતી. તપાસ દરમિયાન મોપેડ જલાલપોર તાલુકાના બોરસી-માછીવાડ ગામના બસ સ્ટોપ ફળિયામાં રહેતી બેલાબેન હિતેશભાઈ ટંડેલની હોવાનું જાણવા મળ્યું હતું. ત્યારબાદ પોલીસે તેમના ઘરે છાપો મારી બેલાબેન હિતેશભાઈ ટંડેલ તથા રેખાબેન હિતેશભાઈ ટંડેલને ઝડપી પાડ્યા હતા.