આહવાના રસ્તાઓ પર રખડતા ઢોરોનો ત્રાસ, વાહનચાલકોને અકસ્માતનું જોખમ

મુખ્ય માર્ગો અને ચોકમાં ઢોરો અડિંગો જમાવતા સ્થાનિકો પરેશાન; પશુઓને પકડી પાંજરાપોળ ખસેડવાની માંગ

ડાંગ : ડાંગ જિલ્લાના મુખ્ય મથક આહવા ખાતે જાહેર રસ્તાઓ પર રખડતા પશુઓનો ત્રાસ દિન-પ્રતિદિન વધી રહ્યો છે. શહેરના મુખ્ય માર્ગો, ચોક અને જાહેર રસ્તાઓ પર ઢોરો અડિંગો જમાવીને બેસી રહેતા હોવાથી વાહનચાલકો અને રાહદારીઓને ભારે હાલાકીનો સામનો કરવો પડી રહ્યો છે.

આહવા ખાતે અનેક સરકારી કચેરીઓ આવેલી છે. ઉપરાંત આસપાસના વિસ્તારોમાં ફરવા અને જોવા લાયક સ્થળો હોવાને કારણે અન્ય જિલ્લાઓ તેમજ મહારાષ્ટ્ર તરફથી પણ મોટી સંખ્યામાં વાહનચાલકો અહીંથી પસાર થાય છે. જોકે મુખ્ય રસ્તાઓ પર રખડતા ઢોરો રસ્તાની વચ્ચોવચ બેસી રહેતા હોવાથી અકસ્માતનું જોખમ સર્જાઈ રહ્યું છે.

સ્થાનિક લોકો આ સમસ્યાથી પરિચિત હોવાથી તેઓ સાવચેતી રાખીને વાહન ચલાવે છે, પરંતુ બહારના જિલ્લાઓ કે અન્ય રાજ્યોમાંથી આવતા વાહનચાલકોને રસ્તા પર અચાનક બેઠેલા ઢોરોની જાણ ન હોવાથી અકસ્માત સર્જાવાની શક્યતા વધી જાય છે.

બીજી તરફ રખડતા ઢોરો રસ્તા પર ઝઘડતા હોય ત્યારે નજીક ઊભેલા અથવા પસાર થતા વાહનો સાથે અથડાઈ શકે છે, જેના કારણે વાહનોને નુકસાન થવાની પણ ભીતિ રહે છે. આ પરિસ્થિતિને ધ્યાનમાં રાખીને સ્થાનિકોએ રસ્તા પર રખડતા પશુઓને તાત્કાલિક પકડી પાંજરાપોળ ખાતે ખસેડવાની માંગ કરી છે.