નવસારીમાં 4 આઇકોનિક રોડ, વિજલપોરમાં એક પણ નહીં; વિકાસમાં ભેદભાવની ચર્ચા

આઇકોનિક રોડ તો દૂર, શિવાજીચોકથી શુશ્રુષા હોસ્પિટલ સુધીનો બિસમાર રસ્તો રિપેર કરવાની રહીશોની માંગ

નવસારી : નવસારી મહાનગરપાલિકા દ્વારા નવસારી શહેર વિસ્તારમાં ચાર આઇકોનિક રોડ બનાવવામાં આવ્યા છે, પરંતુ વિજલપોર વિસ્તારમાં એક પણ આઇકોનિક રોડ ન બનતા સ્થાનિકોમાં અસંતોષ જોવા મળી રહ્યો છે. મનપાના વિકાસના કામોમાં વિજલપોર વિસ્તારની અવગણના થઈ રહી હોવાના સવાલો ઉઠી રહ્યા છે અને ઉચ્ચ અધિકારીઓ વિજલપોરની પ્રજા સાથે ભેદભાવ રાખતા હોવાની ચર્ચા પણ સ્થાનિકોમાં ચાલી રહી છે.

નવસારી શહેરમાં પીવાના પાણીની લાઈનમાં ભંગાણ, દૂષિત પાણી, ડ્રેનેજ લાઈન અને ભૂવા પડવા જેવી અનેક સમસ્યાઓ વચ્ચે મનપા દ્વારા સારા રસ્તા, સ્ટ્રીટ લાઈટ અને રેલવે ઓવરબ્રિજ જેવી સુવિધાઓ પણ આપવામાં આવી છે. શહેરના ઘણા વિસ્તારોમાં પ્રાથમિક સુવિધાઓ સારી હોવાનું માનવામાં આવે છે, પરંતુ વિજલપોરમાં વિકાસના કામોની ગતિ ધીમી હોવાની સ્થાનિકોમાં ફરિયાદ છે.

નવસારીમાં ફુવારાથી સ્ટેશન સુધીનો રોડ, અગ્રવાલ કોલેજ સુધીનો રોડ, છાપરા તરફનો રોડ તેમજ જમનાપાર્કથી ઇટાળવા સુધીનો રસ્તો આઇકોનિક રોડ તરીકે વિકસાવવામાં આવ્યો છે. આ માર્ગો પરથી રોજ હજારો વાહનોની અવરજવર થાય છે. બીજી તરફ વિજલપોર વિસ્તારમાં એક પણ રોડને આઇકોનિક રોડ તરીકે વિકસાવવામાં આવ્યો નથી. જેને લઈને સ્થાનિકોમાં “વિકાસના નકશામાં વિજલપોર છે કે નહીં?” તેવો સવાલ ઉઠી રહ્યો છે.

વિજલપોર વિસ્તારમાં વિઠ્ઠલ મંદિરથી શિવાજીચોક થઈ શુશ્રુષા હોસ્પિટલ અને ત્યાંથી એક તરફ સાંઢકુવા તથા બીજી તરફ આશાપુરી માતાના મંદિર થઈ નવસારી શહેરને જોડતો માર્ગ સ્થાનિકો માટે મહત્વપૂર્ણ છે. ખાસ કરીને શિવાજીચોકથી શુશ્રુષા હોસ્પિટલ સુધીનો રોડ બિસમાર હાલતમાં હોવાથી વાહનચાલકોને રોજિંદી અવરજવરમાં ભારે મુશ્કેલી પડી રહી છે. સ્થાનિક રહીશોનું કહેવું છે કે નવો આઇકોનિક રોડ બનાવવાની જગ્યાએ હાલના બિસમાર રસ્તાનું જ તાત્કાલિક રિપેરિંગ કરવામાં આવે તો પણ લોકોને મોટી રાહત મળી શકે.

નવસારી મહાનગરપાલિકાના હાલના ડેપ્યુટી કમિશ્નર જે.યુ. વસાવા અગાઉ તત્કાલીન વિજલપોર નગરપાલિકામાં ચીફ ઓફિસર તરીકે ફરજ બજાવી ચૂક્યા છે. ત્યારબાદ નવસારી-વિજલપોર નગરપાલિકા રચાયા બાદ પણ તેમણે ચીફ ઓફિસર તરીકે ફરજ બજાવી હતી. તેથી તેઓ નવસારી અને વિજલપોર વિસ્તાર તેમજ અહીંની સ્થાનિક સમસ્યાઓથી સારી રીતે પરિચિત હોવાનું માનવામાં આવે છે.

હાલના મહાનગરપાલિકા કમિશ્નર નવા હોવાથી સમગ્ર મનપા વિસ્તારની સમસ્યાઓ અંગે સંપૂર્ણ માહિતી મેળવવામાં સમય લાગી શકે છે. જોકે વિજલપોર અને નવસારી વિસ્તારમાં અગાઉ ફરજ બજાવી ચૂકેલા ડેપ્યુટી કમિશ્નર જે.યુ. વસાવા વિસ્તારની પરિસ્થિતિથી અવગત હોવા છતાં વિજલપોરમાં વિકાસના કામો કાચબાની ગતિએ ચાલી રહ્યા હોવાની ચર્ચા સ્થાનિકોમાં થઈ રહી છે.