કાગદીવાડમાં ખુલ્લા ખાડામાં ગંદુ પાણી ભરાતા મચ્છર અને દુર્ગંધથી સ્થાનિકો પરેશાન

પીવાના પાણીની લાઈન રિપેર કર્યા બાદ ખાડો ન પૂરાતા સમસ્યા વકરી; સામે જ મેલેરિયા વિભાગની કચેરી હોવા છતાં કાર્યવાહી નહીં

નવસારી : નવસારીના કાગદીવાડ વિસ્તારમાં પીવાના પાણીની લાઈનમાં ભંગાણ પડતા મહાનગરપાલિકા દ્વારા ખોદકામ કરી રિપેરિંગ કામગીરી કરવામાં આવી હતી. જોકે રિપેરિંગ પૂર્ણ થયા બાદ ખાડો પૂરવામાં ન આવતા તેમાં પાણી ભરાઈ ગયું છે. ઘણા દિવસોથી ભરાયેલું પાણી હવે ગંદુ અને દુષિત બનતા મચ્છરોનો ઉપદ્રવ વધી રહ્યો છે તેમજ ખાડામાંથી પાણી રસ્તા પર આવતા દુર્ગંધથી સ્થાનિકો પરેશાન બન્યા છે.

થોડા દિવસો અગાઉ કાગદીવાડ પાસેથી પસાર થતી પીવાના પાણીની લાઈનમાં ભંગાણ સર્જાયું હતું. જેને રિપેર કરવા માટે મહાનગરપાલિકાના કર્મચારીઓએ ખાડો ખોદી કામગીરી હાથ ધરી હતી. પીવાના પાણીની લાઈનનું રિપેરિંગ પૂર્ણ કરી દેવામાં આવ્યું હતું, પરંતુ ત્યારબાદ ખાડો પૂરવામાં આવ્યો ન હોવાથી તે હજી સુધી ખુલ્લો પડ્યો છે.

ખાડામાં ઘણા દિવસોથી પાણી ભરાયેલું રહેતા તે ગંદુ અને દુષિત થઈ ગયું છે. જેના કારણે વિસ્તારમાં મચ્છરોનો ઉપદ્રવ વધ્યો છે. બીજી તરફ ખાડામાંથી ગંદુ પાણી બહાર આવી રસ્તા પર ફેલાતું હોવાથી આસપાસ દુર્ગંધ ફેલાઈ રહી છે. પરિણામે સ્થાનિક રહીશો ઉપરાંત આ માર્ગ પરથી પસાર થતા વાહનચાલકોને પણ ભારે મુશ્કેલીનો સામનો કરવો પડી રહ્યો છે.

ખાસ બાબત એ છે કે જ્યાં આ ગંદુ પાણી ભરાયેલું છે તેની સામે જ નવસારી મહાનગરપાલિકાના શહેરી મેલેરિયા વિભાગની કચેરી આવેલી છે અને પાછળના ભાગે વોટર વર્ક્સનો પ્લાન્ટ પણ આવેલો છે. અહીંથી મનપાના કર્મચારીઓની રોજિંદી અવરજવર થતી હોવા છતાં સમસ્યાનો ઉકેલ આવ્યો નથી. સ્થાનિકોએ ખાડો તાત્કાલિક પૂરી ગંદા પાણીનો નિકાલ કરવા અને મચ્છરોના ઉપદ્રવને રોકવા જરૂરી કાર્યવાહી કરવાની માંગ કરી છે.