આહવામાં રખડતા પશુઓની જાહેર હરાજી સામે વિરોધ, પાંજરાપોળમાં મોકલવાની માંગ

સુરત અને નવસારીની પ્રાણી અત્યાચાર નિવારણ સમિતિઓની કલેક્ટરને રજૂઆત; પશુપાલકોને પોતાના પશુઓ પરત લઈ જવાની તક આપવા અનુરોધ

ડાંગ : ડાંગ જિલ્લાના મુખ્ય મથક આહવા નગર અને આસપાસના વિસ્તારમાં રખડતા પશુઓ તથા ગૌવંશના પ્રશ્નને લઈને સુરત અને નવસારી જિલ્લા પ્રાણી અત્યાચાર નિવારણ સમિતિ દ્વારા આહવા ખાતે પ્રેસ કોન્ફરન્સ યોજવામાં આવી હતી. તેમાં રખડતા પશુઓની જાહેર હરાજી ન કરવા અને તેમને પાંજરાપોળમાં મોકલવાની માંગ કરવામાં આવી હતી.

પ્રેસ કોન્ફરન્સમાં સુરત જિલ્લા પ્રાણી અત્યાચાર નિવારણ સમિતિના આશિનભાઈ ગાંધી, નવસારી જિલ્લા પ્રાણી અત્યાચાર નિવારણ સમિતિના મહેન્દ્રભાઈ શાહ તેમજ જીવદયા ક્ષેત્રના અગ્રણી કાર્યકર્તા જગદીશભાઈ સહિતના આગેવાનો ઉપસ્થિત રહ્યા હતા.

સમિતિના આગેવાનોના જણાવ્યા મુજબ, આહવાના રસ્તાઓ પર રખડતા પશુઓના કારણે અવારનવાર સમસ્યાઓ સર્જાય છે. ગ્રામપંચાયત દ્વારા આવા પશુઓને રાખવા માટે ઢોર ડબ્બાની વ્યવસ્થા કરવામાં આવે છે, પરંતુ ત્યારબાદ તેમના કાયમી નિરાકરણનો પ્રશ્ન ઊભો થાય છે. આહવા ગ્રામપંચાયત દ્વારા 22 તારીખે રખડતા પશુઓની જાહેર હરાજી રાખવામાં આવી હોવાનું સમિતિએ જણાવ્યું હતું. ગૌવંશ સહિતના પશુઓની જાહેર હરાજી કરવી યોગ્ય નથી તેમ જણાવી સમિતિએ તેનો વિરોધ નોંધાવ્યો હતો.

સમિતિએ જિલ્લા કલેક્ટરને રજૂઆત કરીને હરાજી રદ કરવા અને પશુઓને પાંજરાપોળમાં મોકલવાની માંગ કરી છે. સમિતિના જણાવ્યા મુજબ, દક્ષિણ ગુજરાતની અનેક પાંજરાપોળો આવા પશુઓને સ્વીકારવા તૈયાર છે. જે પશુપાલકો પોતાના પશુઓ ઓળખીને પરત લઈ જવા માંગતા હોય તેમને તક આપવામાં આવે અને બાકીના પશુઓને વિવિધ પાંજરાપોળમાં મોકલી તેમના રક્ષણ તથા સંભાળની વ્યવસ્થા કરવામાં આવે તેવી રજૂઆત કરાઈ છે.

રખડતા પશુઓની સમસ્યાના માનવતાભર્યા અને કાયમી ઉકેલ માટે જાહેર હરાજીના બદલે પાંજરાપોળનો વિકલ્પ અપનાવવામાં આવે તેવી પ્રાણીપ્રેમી સંસ્થાઓએ માંગ કરી છે.