સેવા સંકલ્પ અભિયાન અંતર્ગત ડાંગની ૭૫ શાળાઓમાં સફાઈ સાથે વૃક્ષારોપણ

વિદ્યાર્થીઓ અને શિક્ષકોની આશરે ૭૫૦ ટીમોએ સ્વચ્છતા અભિયાનમાં ભાગ લીધો; અંદાજે ૧.૫ ટન ઘન કચરાનો નિકાલ

ડાંગ જિલ્લામાં સેવા સંકલ્પ અભિયાન અંતર્ગત સ્વચ્છતા અને પર્યાવરણ સંરક્ષણને પ્રોત્સાહન આપવા માધ્યમિક અને ઉચ્ચતર માધ્યમિક શાળાઓમાં સફાઈ તથા વૃક્ષારોપણ અભિયાન યોજાયું હતું.

જિલ્લાની કુલ ૭૫ શાળાઓમાં વિદ્યાર્થીઓ અને શિક્ષકોની આશરે ૭૫૦ ટીમોએ શાળા પરિસર તેમજ આસપાસના વિસ્તારોમાં વ્યાપક સફાઈ કામગીરી હાથ ધરી હતી. અભિયાન દરમિયાન અંદાજે ૧.૫ ટન ઘન કચરાનો નિકાલ કરવામાં આવ્યો હતો.

સફાઈની સાથે શાળા પરિસર અને આસપાસના વિસ્તારોમાં વૃક્ષારોપણ કરી પર્યાવરણ જાળવણીનો સંદેશ આપવામાં આવ્યો હતો. વિદ્યાર્થીઓ અને શિક્ષકોએ ઉત્સાહપૂર્વક ભાગ લઈ સ્વચ્છતા તથા હરિયાળી જાળવવાનો સંકલ્પ લીધો હતો.

આ પ્રસંગે જિલ્લા શિક્ષણ અધિકારી જીગ્નેશ ત્રિવેદીએ ડાંગ જિલ્લાને સ્વચ્છ રાખવા સૌને હાકલ કરી હતી. તેમણે સ્વચ્છતા અભિયાનને માત્ર એક દિવસ પૂરતું મર્યાદિત ન રાખતાં દૈનિક જીવનનો હિસ્સો બનાવવા વિદ્યાર્થીઓ અને શિક્ષકોને પ્રેરણા આપી હતી.

સેવા સંકલ્પ અભિયાન હેઠળ યોજાયેલી આ કામગીરી દ્વારા ‘સ્વચ્છ ડાંગ–હરિત ડાંગ’નો સંદેશ શાળાઓ મારફતે સમાજ સુધી પહોંચાડવામાં આવ્યો હતો.