આહવાના મહાલપાડા ગામે રૂ. 4.50 લાખના નાળાના કામમાં ભ્રષ્ટાચારના આક્ષેપ

મધ્યમ વરસાદમાં જ નાળું ધોવાઈ જતાં ગ્રામજનોમાં રોષ; ઉચ્ચસ્તરીય ટેકનિકલ તપાસ અને જવાબદારો સામે કાર્યવાહીની માંગ

ડાંગ : ડાંગ જિલ્લાના આહવા તાલુકાના મહાલપાડા ગામે એ.ટી.વી.ટી. યોજના હેઠળ વર્ષ 2024-25 દરમિયાન મંજૂર થયેલા નાળાના નિર્માણ કાર્યની ગુણવત્તાને લઈને ગંભીર સવાલો ઊભા થયા છે. ગ્રામજનો દ્વારા અંદાજે રૂ. 4.50 લાખના આ કામમાં ભ્રષ્ટાચાર અને હલકી ગુણવત્તાના મટીરીયલના ઉપયોગના આક્ષેપો કરવામાં આવ્યા છે.

મહાલપાડા ગામે જાનુભાઈના ખેતરથી ઈશ્વરભાઈની જમીન તરફ જવાના રસ્તા પર નાળાનું કામ કરવામાં આવ્યું હતું. સ્થાનિકોના આક્ષેપ મુજબ બાંધકામમાં ગુણવત્તાસભર મટીરીયલનો પૂરતો ઉપયોગ ન થતાં સામાન્યથી મધ્યમ વરસાદમાં જ નાળાનો ભાગ તૂટી ગયો અને કામગીરીની ગુણવત્તા સામે પ્રશ્નો ઊભા થયા છે.

ગ્રામજનોનું કહેવું છે કે વિકાસના કામ માટે ખર્ચાયેલા સરકારી નાણાં સામે કામની મજબૂતી અને ટકાઉપણું જોવા મળતું નથી. માત્ર એક જ સીઝનના વરસાદમાં કામને નુકસાન થતાં બાંધકામની ગુણવત્તા, મટીરીયલ અને દેખરેખ અંગે તપાસ કરવાની માંગ ઉઠી છે.

સ્થાનિક રહીશોએ સમગ્ર કામગીરીની ઉચ્ચસ્તરીય ટેકનિકલ તપાસ, વપરાયેલા મટીરીયલની ગુણવત્તાની ચકાસણી તેમજ જવાબદાર એજન્સી, સરપંચ અને સંબંધિત અધિકારીઓની ભૂમિકાની તપાસ કરવાની માંગ કરી છે.

સાથે જ તૂટી ગયેલા નાળાનું તાત્કાલિક ધોરણે મજબૂત અને ગુણવત્તાસભર પુનઃનિર્માણ કરવામાં આવે તેવી પણ માંગ કરવામાં આવી છે. ગ્રામજનોએ ચીમકી આપી છે કે જો મામલે યોગ્ય કાર્યવાહી નહીં થાય તો તેઓ ઉચ્ચ કક્ષાએ રજૂઆત કરીને વિરોધ નોંધાવશે.