ડાંગ કલેક્ટરની દગડીઆંબા ગામની મુલાકાત દરમિયાન વિશેષ સફાઈ અભિયાન

ગ્રામજનો સાથે શ્રમદાન કરી સ્વચ્છતાનો સંદેશ આપ્યો, આંગણવાડી-શાળા સહિત વિવિધ સુવિધાઓની પણ સમીક્ષા

ડાંગ : સ્વચ્છતા અને સંવેદનાના સુભગ સમન્વય સાથે ગ્રામીણ વિસ્તારમાં આરોગ્યપ્રદ વાતાવરણ નિર્માણ કરવાના હેતુથી ડાંગ કલેક્ટર એન.ડી. પરમારે વઘઈ તાલુકાના દગડીઆંબા ગામની મુલાકાત લીધી હતી. મુલાકાત દરમિયાન તેમણે માત્ર નિરીક્ષણ પૂરતું સીમિત ન રહી સ્થાનિક ગ્રામજનો સાથે સીધો સંવાદ સાધી સ્વચ્છતાનું મહત્વ સમજાવ્યું હતું.

કલેક્ટરની હાજરી અને પ્રોત્સાહનથી ગ્રામજનોમાં ઉત્સાહ જોવા મળ્યો હતો. સ્થાનિક સરપંચની આગેવાની હેઠળ ગ્રામજનોએ શેરીઓ અને જાહેર રસ્તાઓ પરથી કચરો એકત્રિત કરી શ્રમદાન કર્યું હતું. એકત્રિત થયેલો કચરો યોગ્ય રીતે ડસ્ટબિનમાં જ એકઠો થાય અને ગામના દરેક નાગરિક પોતાના ઘર સાથે આસપાસનો વિસ્તાર પણ સ્વચ્છ રાખે તે માટે અધિકારીઓએ અપીલ કરી હતી.

આ સફાઈ અભિયાન દરમિયાન વહીવટી તંત્રના અન્ય જવાબદાર અધિકારીઓ પણ હાજર રહ્યા હતા અને સમગ્ર કામગીરીનું નિરીક્ષણ કરી જરૂરી માર્ગદર્શન આપ્યું હતું. ગ્રામજનોએ પોતાના ગામને વધુ સ્વચ્છ અને સુંદર બનાવવાનો સંકલ્પ પણ લીધો હતો.

દગડીઆંબા ગામની મુલાકાત દરમિયાન કલેક્ટરે મહેસુલી તલાટીની કામગીરીની સમીક્ષા કરવાની સાથે ગામની આંગણવાડી, પ્રાથમિક શાળા અને વાજબી ભાવની દુકાનની પણ મુલાકાત લીધી હતી. વિવિધ સેવાઓ અંગે માહિતી મેળવી જરૂરી માર્ગદર્શન પૂરું પાડ્યું હતું. આ પહેલ દ્વારા ‘સ્વચ્છતા હી સેવા’નો સંદેશ ગ્રામ્ય સ્તરે વધુ અસરકારક રીતે પહોંચાડવાનો પ્રયાસ કરવામાં આવ્યો હતો.