આહવામાં રખડતા ઢોરો સામે ગ્રામ પંચાયતની કાર્યવાહી

રંગ ઉપવન ગ્રાઉન્ડમાં 250થી વધુ રખડતા ઢોરોને પકડી રાખવામાં આવ્યા; ઘાસચારા અને પાણીની વ્યવસ્થા કરાઈ

ડાંગ : ડાંગ જિલ્લાના મુખ્ય મથક આહવા ખાતે રસ્તાઓ પર રખડતા ઢોરોના કારણે સર્જાતા અકસ્માતો અને નાગરિકોને પડતી મુશ્કેલીઓને ધ્યાનમાં રાખીને આહવા ગ્રામ પંચાયત દ્વારા કાર્યવાહી હાથ ધરવામાં આવી છે.

આહવા ગ્રામ પંચાયતના સરપંચ હરીરામ સાવંતની આગેવાની હેઠળ શહેરના વિવિધ વિસ્તારોમાંથી આશરે 250થી વધુ રખડતા ઢોરોને પકડીને રંગ ઉપવન ગ્રાઉન્ડ ખાતે રાખવામાં આવ્યા હતા. પંચાયત દ્વારા પકડાયેલા ઢોરો માટે ઘાસચારા તેમજ પીવાના પાણીની વ્યવસ્થા પણ કરવામાં આવી હતી.

ગ્રામ પંચાયતના જણાવ્યા મુજબ, રસ્તાઓ પર રખડતા ઢોરોના કારણે અવારનવાર અકસ્માતો સર્જાતા હોવાની ફરિયાદો ગ્રામજનો તરફથી મળી રહી હતી. આ ફરિયાદોને ગંભીરતાથી લઈને પંચાયત દ્વારા ઢોરોને પકડી નિયંત્રિત કરવાની કામગીરી શરૂ કરવામાં આવી છે.

જે ઢોરોના માલિકો પોતાના ઢોર પરત લેવા આવશે તેમની પાસેથી નિયમ મુજબ દંડ વસૂલી ઢોર પરત સોંપવામાં આવશે. જ્યારે જે ઢોરોને લેવા માટે કોઈ માલિક આગળ નહીં આવે તેવા ઢોરોને આગળની કાર્યવાહી હેઠળ પાંજરાપોળમાં મોકલવામાં આવશે.

રખડતા ઢોરોના કારણે વાહનચાલકો અને રાહદારીઓની સલામતી સામે ઉભા થતા જોખમને ધ્યાનમાં રાખીને હાથ ધરાયેલી આ કાર્યવાહીથી અકસ્માતોની ઘટનાઓમાં ઘટાડો થાય તેવી આશા ગ્રામજનો વ્યક્ત કરી રહ્યા છે.