અટગામ-ચીખલી રોડ પર ₹10.20 લાખના વિદેશી દારૂ ભરેલી ફોર્ચ્યુનર ઝડપાઈ, બેની ધરપકડ

સ્ટેટ મોનીટરીંગ સેલે મલીયાધરા ગામ પાસે કાર્યવાહી કરી કુલ ₹30.40 લાખનો મુદ્દામાલ કબજે કર્યો; છ આરોપી વોન્ટેડ

નવસારી : અટગામ-ચીખલી રોડ પર મલીયાધરા ગામ નજીક સ્ટેટ મોનીટરીંગ સેલની ટીમે બાતમીના આધારે કાર્યવાહી કરી વિદેશી દારૂ ભરેલી ફોર્ચ્યુનર કાર ઝડપી પાડી હતી. કારમાંથી રૂ. 10.20 લાખથી વધુની કિંમતનો વિદેશી દારૂ મળી આવતા પોલીસે બે આરોપીઓને ઝડપી પાડ્યા હતા, જ્યારે આ મામલે અન્ય છ આરોપીઓને વોન્ટેડ જાહેર કરી વધુ તપાસ હાથ ધરી છે.

મળતી માહિતી મુજબ, ગાંધીનગર સ્ટેટ મોનીટરીંગ સેલ પોલીસને બાતમી મળી હતી કે નવસારીમાં રહેતો નસીમુદ્દીન ઉર્ફે આઝાદ દમણથી તેના માણસો મારફતે ગ્રે રંગની ફોર્ચ્યુનર કાર નં. GJ-05-TC-0170માં વિદેશી દારૂનો જથ્થો ભરાવી સુરત તરફ મોકલવાનો છે. આ કાર આગળ બીજી સ્કોર્પિયો કાર મારફતે પાયલોટિંગ કરવામાં આવનાર હોવાની પણ પોલીસને માહિતી મળી હતી.

બાતમીના આધારે પોલીસે મલીયાધરા ગામ નજીક વોચ ગોઠવી હતી. દરમિયાન શંકાસ્પદ ફોર્ચ્યુનર કાર આવતા પોલીસે તેને રોકી તપાસ હાથ ધરી હતી. તપાસ દરમિયાન કારમાંથી રૂ. 10,20,960ની કિંમતની વિદેશી દારૂની કુલ 4,484 બોટલો મળી આવી હતી.

પોલીસે આ મામલે વાપી તાલુકાના બલીઠા ગામના જીતુ ઉર્ફે યતિન કિશોરભાઈ રાઠોડ તથા પારડી તાલુકાના સરોધી ગામના મીત ઉર્ફે મીતલો નટવરભાઈ માહ્યાવંશીને ઝડપી પાડ્યા હતા.

આ કેસમાં દારૂનો જથ્થો મોકલાવવાનો આક્ષેપ ધરાવતા નવસારીના નસીમુદ્દીન ઉર્ફે આઝાદ લંગડો નીઝામુદ્દીન હાફેઝ ઉપરાંત સુરતના વિવેક, દમણના શાહબાજ અને પગલો તેમજ દારૂ મંગાવનાર તથા કાર માલિક સહિત કુલ છ શખ્સોને વોન્ટેડ જાહેર કરવામાં આવ્યા છે.

પોલીસે ઘટનાસ્થળેથી રૂ. 10,20,960નો વિદેશી દારૂ, રૂ. 20 હજારનો મોબાઇલ ફોન તથા અંદાજે રૂ. 20 લાખની ફોર્ચ્યુનર કાર સહિત કુલ રૂ. 30,40,960નો મુદ્દામાલ કબજે કર્યો હતો. સમગ્ર મામલે આગળની તપાસ પી.આઈ. વી.જી. ભરવાડ દ્વારા હાથ ધરવામાં આવી છે.