ચીકટિયા ગામની વીજળીની સમસ્યાનું ડાંગ કલેક્ટર દ્વારા ત્વરિત નિરાકરણ

48 કલાકથી ઓછા સમયમાં કાર્યવાહી; 5 નમેલા વીજ પોલ સીધા કરાયા, 4 નવા પોલ ઊભા કરી 3 નવા વીજ જોડાણ અપાયા

ડાંગ : ડાંગ જિલ્લાના વહીવટી તંત્રને વધુ ગતિશીલ, પારદર્શી અને લોકાભિમુખ બનાવવાના હેતુસર જિલ્લા કલેક્ટર એન.ડી. પરમારે આહવા તાલુકાના ચીકટિયા ગામની મુલાકાત લઈ ગ્રામજનો સાથે સીધો સંવાદ કર્યો હતો. મુલાકાત દરમિયાન લોકોએ ગામની વીજળી સંબંધિત વિવિધ સમસ્યાઓ અંગે રજૂઆત કરી હતી.

ગ્રામજનોએ થ્રી-ફેઝ વીજ જોડાણ, વિવિધ સ્થળોએ નમી ગયેલા વીજ પોલ, ઢીલા વીજ વાયરો તેમજ નવા મકાનોમાં વીજ જોડાણ મેળવવામાં પડતી મુશ્કેલીઓ અંગે કલેક્ટરને રજૂઆત કરી હતી. રજૂઆતને પગલે કલેક્ટર એન.ડી. પરમારે વીજ વિભાગના અધિકારીઓને તાત્કાલિક કાર્યવાહી માટે જરૂરી સૂચનાઓ આપી હતી.

વીજ વિભાગ દ્વારા 48 કલાકથી પણ ઓછા સમયમાં ચીકટિયા ગામના આચાર્યને જરૂરી માર્ગદર્શન આપી લોડ વધારવા માટેની અરજી કરાવવામાં આવી હતી. અંદાજપત્ર ભર્યાના સાત દિવસમાં થ્રી-ફેઝ જોડાણની અરજીનો હકારાત્મક નિકાલ કરવાની ખાતરી પણ આપવામાં આવી હતી.

આ ઉપરાંત ગામમાં નમી ગયેલા અંદાજે 5 વીજ પોલ સીધા કરવામાં આવ્યા હતા અને અન્ય 4 નવા વીજ પોલ ઊભા કરવામાં આવ્યા હતા. આ કામગીરીથી વીજ માળખાની સલામતી તથા વીજ પુરવઠાની વિશ્વસનીયતા વધુ સુદૃઢ બનાવવામાં આવી હતી.

વીજ જોડાણ માટે પેન્ડિંગ રહેલી 3 અરજીઓનો પણ નિકાલ કરીને તાત્કાલિક નવા વીજ જોડાણ આપવામાં આવ્યા હતા. આમ, આહવા વીજ વિભાગ દ્વારા ગ્રામજનોના પ્રશ્નોનું ઝડપી અને અસરકારક નિરાકરણ લાવવામાં આવ્યું હતું.

કલેક્ટરની સૂચનાથી તાત્કાલિક કાર્યવાહી હાથ ધરાતાં ગ્રામજનોએ તંત્રની કામગીરી પ્રત્યે સંતોષ વ્યક્ત કરીને કલેક્ટરનો આભાર માન્યો હતો. મુલાકાત દરમિયાન આહવા મામલતદાર રજની વૈષ્ણવ સહિત સંબંધિત અધિકારી-કર્મચારીઓ અને ગ્રામજનો ઉપસ્થિત રહ્યા હતા.