સુબીર તાલુકાના ગ્રામ્ય વિસ્તારોમાં પ્રાકૃતિક કૃષિ અંગે ખેડૂતોને તાલીમ અપાઈ

આત્મા પ્રોજેક્ટ હેઠળ માળગા ક્લસ્ટરના ખાંબલા, માળગા અને મોહપાડા ગામના ખેડૂતોને પ્રાકૃતિક ખેતીના લાભો અને પદ્ધતિઓ અંગે માર્ગદર્શન

ડાંગ : ખેડૂતોને પ્રાકૃતિક કૃષિ તરફ વધુ પ્રેરિત કરવા તેમજ ટકાઉ અને પર્યાવરણમૈત્રી ખેતી પદ્ધતિઓનો વ્યાપ વધારવાના હેતુથી આત્મા પ્રોજેક્ટ અંતર્ગત ગુજરાત પ્રાકૃતિક વિકાસ બોર્ડ દ્વારા ડાંગ જિલ્લાના સુબીર તાલુકાના માળગા ક્લસ્ટરમાં સમાવિષ્ટ ખાંબલા, માળગા અને મોહપાડા ગામના ખેડૂતો માટે પ્રાકૃતિક કૃષિ અંગે તાલીમ કાર્યક્રમો યોજવામાં આવ્યા હતા.

આ તાલીમ દરમિયાન ખેડૂતોને પ્રાકૃતિક ખેતીના વિવિધ લાભો વિશે માહિતી આપવામાં આવી હતી. ઓછા ખર્ચે વધુ ઉત્પાદન મેળવવાના ઉપાયો, જમીનની ફળદ્રુપતા જાળવવાની પદ્ધતિઓ તેમજ રાસાયણિક ખાતર અને જંતુનાશકોના વિકલ્પરૂપે અપનાવી શકાય તેવી પ્રાકૃતિક કૃષિ પદ્ધતિઓ અંગે વિસ્તૃત માર્ગદર્શન આપવામાં આવ્યું હતું.

ખેડૂતોને પ્રાકૃતિક ખેતીના મહત્વપૂર્ણ આયામો અંગે પણ સમજણ આપવામાં આવી હતી. ખાસ કરીને જીવામૃત અને ઘનજીવામૃત જેવી પદ્ધતિઓનો ઉપયોગ કેવી રીતે કરવો અને તેનાથી જમીન તથા પાકને થતા લાભો અંગે માહિતી આપવામાં આવી હતી.

ડાંગ જિલ્લામાં પ્રાકૃતિક કૃષિનો વ્યાપ વધે, ખેડૂતોનો ઉત્પાદન ખર્ચ ઘટે અને તેમની આવકમાં વધારો થાય તે હેતુથી આત્મા પ્રોજેક્ટ દ્વારા આવી તાલીમલક્ષી અને પ્રેરણાત્મક પ્રવૃત્તિઓ સતત હાથ ધરવામાં આવી રહી છે.