નવસારીના વાડા ગામમાં તબેલો તોડવા બાબતે વિવાદ સર્જાયો

નોટિસ આપ્યા વિના પોલીસ બંદોબસ્ત સાથે તોડકામ માટે પહોંચ્યાના આક્ષેપ, સરપંચની કામગીરીની તપાસની માંગ

નવસારી : વાડા ગામમાં તબેલા પર બુલડોઝર ફેરવી તોડી પાડવાની કામગીરીને લઈ વિવાદ સર્જાયો છે. ગામના સરપંચ પોલીસ બંદોબસ્ત સાથે બુલડોઝર લઈ આવી તબેલો તોડવાની કાર્યવાહી હાથ ધરતાં, સરપંચ નોટિસ આપ્યા વિના મનમાની કરી રહ્યા હોવાના આક્ષેપો તબેલાના માલિક દ્વારા કરવામાં આવ્યા છે.

નવસારી તાલુકાના વાડા ગામના સરપંચ પોલીસ બંદોબસ્ત સાથે બુલડોઝર લઈ ચંપાબેન પટેલના તબેલાને તોડવાની કામગીરી માટે સ્થળ પર પહોંચ્યા હતા. જ્યાં તબેલાના માલિક અને સરપંચ વચ્ચે તબેલો તોડવા બાબતે વિવાદ સર્જાયો હતો. આ ઘટનાને લઈ ચંપાબેન પટેલે સરપંચની કામગીરી સામે સવાલો ઉઠાવ્યા હતા.

તેમના જણાવ્યા મુજબ, પંચાયત કે તંત્ર દ્વારા આ કાર્યવાહી અંગે અગાઉથી કોઈ જાણ કરવામાં આવી નહોતી. તંત્ર કે સરપંચ તરફથી કોઈપણ પ્રકારની કાયદેસરની નોટિસ આપ્યા વિના અચાનક પોલીસ પ્રોટેક્શન અને બુલડોઝર સાથે સ્થળ પર પહોંચી તોડકામ કરવાની તજવીજ હાથ ધરાઈ હોવાના આક્ષેપો કરવામાં આવ્યા છે.

ઘટનાના પગલે આજુબાજુના ગામોમાં પણ ચકચાર મચી ગઈ હતી. સ્થાનિક ગામજનો ચંપાબેનના સમર્થનમાં આવી પંચાયતની કામગીરી સામે સવાલો ઉઠાવી રહ્યા છે. ગામજનોમાં એવી ચર્ચા થઈ રહી છે કે જો રસ્તો પહોળો કરવાનો નિર્ણય લેવામાં આવ્યો હોય તો અસરગ્રસ્તોને અગાઉથી નોટિસ આપી જાણ કરવી જોઈએ તેમજ તેમને રજૂઆત કરવા માટે યોગ્ય સમય આપવો જરૂરી છે.

આ સાથે સરપંચ દ્વારા હાથ ધરાયેલી સમગ્ર કામગીરીની તપાસ કરવામાં આવે તેવી માંગ પણ ગામજનો દ્વારા ઉઠાવવામાં આવી છે.