ડિજિટલ એરેસ્ટના ગુનામાં સંડોવાયેલો આરોપી બેંગ્લોરથી ઝડપાયો

વૃદ્ધને એક મહિના સુધી ડિજિટલ એરેસ્ટમાં રાખી ₹39.80 લાખ પડાવ્યાનો કેસ, નવસારી સાયબર ક્રાઈમ પોલીસની કાર્યવાહી

નવસારી : નવસારી સાયબર ક્રાઈમ પોલીસે બાતમી અને ટેકનિકલ તપાસના આધારે ડિજિટલ એરેસ્ટના ગુનામાં સંડોવાયેલા આરોપીને બેંગ્લોરથી ઝડપી પાડી આગળની કાર્યવાહી હાથ ધરી છે.

મળતી માહિતી મુજબ, નવસારીના એક વૃદ્ધને સાયબર ઠગોએ અલગ-અલગ વોટ્સએપ નંબર પરથી ફોન કરી દિલ્હી પોલીસના પોલીસ ઇન્સ્પેક્ટર તથા આઈપીએસ સુનીલકુમાર ગૌતમ તરીકે ખોટી ઓળખ આપી હતી. વૃદ્ધનું નામ મની લોન્ડરિંગના કેસમાં જોડાયેલું હોવાનું જણાવી તેમને ભયભીત કરવામાં આવ્યા હતા.

આરોપીઓએ વૃદ્ધને વીડિયો કોલ કરી પોલીસનો પહેરવેશ ધારણ કર્યો હતો તેમજ દિલ્હી પોલીસના લોગોવાળો કમ્પ્લેન્ટ એક્નોલેજમેન્ટ હેડિંગ ધરાવતો લેટર, વૃદ્ધના નામનું એરેસ્ટ વોરંટ તથા આરબીઆઈના સિક્કા અને લોગોવાળો ખોટો લેટર મોકલ્યો હતો. મની લોન્ડરિંગના કેસમાં ફસાવી દેવાની ધમકી આપી વૃદ્ધને એક મહિના સુધી ડિજિટલ એરેસ્ટમાં રાખી તેમની પાસેથી કુલ ₹39.80 લાખ ઓનલાઈન ટ્રાન્સફર કરાવી લીધા હતા. આ અંગે નવસારી સાયબર ક્રાઈમ પોલીસ મથકે ગુનો નોંધાયો હતો.

પોલીસે તપાસ દરમિયાન ટેકનિકલ એનાલિસિસના આધારે મની ટ્રેલને ફોલો કરી ₹39.80 લાખમાંથી ₹24.30 લાખ પોતાના ખાતામાં મેળવનાર આરોપીની સંડોવણી અંગે મહત્વપૂર્ણ પુરાવા મેળવ્યા હતા. ત્યારબાદ ટેકનિકલ વર્કઆઉટ દ્વારા આરોપીના ડિજિટલ ફૂટપ્રિન્ટ મેળવવામાં આવ્યા હતા.

પોલીસે હ્યુમન ઈન્ટેલિજન્સનો ઉપયોગ કરી કર્ણાટકના બેંગ્લોર સ્થિત સોનેનાહાલી, ફર્સ્ટ સી.આર.સી., ફર્સ્ટ બ્લોક, એસ.એમ.વી. સુખી નીલાયા ખાતેથી સંદેશ યમાદુરુ મારીગૌંડાને ઝડપી પાડ્યો હતો. આરોપી સામે આગળની કાયદેસરની કાર્યવાહી નવસારી સાયબર ક્રાઈમ પોલીસ દ્વારા હાથ ધરવામાં આવી રહી છે.