નવસારીની નગર પ્રાથમિક કન્યાશાળા નં. 6માં મટકીફોડનો કાર્યક્રમ યોજાયો

શ્રીકૃષ્ણના જીવન આધારિત વિવિધ સ્પર્ધાઓ યોજાઈ, વિજેતા બાળકોને રોકડ પુરસ્કાર આપી પ્રોત્સાહિત કરાયા

નવસારી : નવસારીની નગર પ્રાથમિક કન્યાશાળા નંબર 6માં શ્રીકૃષ્ણના જીવન પર આધારિત વિવિધ સ્પર્ધાઓ તથા મટકીફોડના ભવ્ય કાર્યક્રમનું આયોજન કરવામાં આવ્યું હતું. આ ઉજવણીમાં શાળાના બાળકોએ ઉત્સાહભેર ભાગ લીધો હતો.

કાર્યક્રમ દરમિયાન વિદ્યાર્થીઓ માટે મટકી શણગાર સ્પર્ધા તેમજ શ્રીકૃષ્ણના જીવન આધારિત પ્રશ્નોત્તરી સ્પર્ધાનું આયોજન કરવામાં આવ્યું હતું. શ્રીકૃષ્ણની મનોહર વેશભૂષા ધારણ કરનાર વિજેતા સ્પર્ધકના હસ્તે મટકી ફોડવામાં આવી હતી, જેના કારણે સમગ્ર વાતાવરણ કૃષ્ણમય બની ગયું હતું.

આ પ્રસંગે શાળાના શિક્ષક જીતેન્દ્રભાઈ પટેલે બાળકોને શ્રીકૃષ્ણના બાળપણથી લઈને સમગ્ર જીવનચરિત્રની રસપ્રદ વાર્તા કહી હતી. જ્યારે શિક્ષક અજય પટેલે શ્રીકૃષ્ણના જીવન પર આધારિત પ્રશ્નોત્તરી સ્પર્ધાનું સફળ સંચાલન કર્યું હતું.

સ્પર્ધામાં વિજેતા થયેલા તમામ ઉત્સાહી બાળકોને શાળાના આચાર્ય કોકીલાબેન પટેલ દ્વારા રોકડ પુરસ્કાર આપી પ્રોત્સાહિત કરવામાં આવ્યા હતા.