રાજ્યના કેબિનેટ મંત્રી જીતુભાઈ વાઘાણીએ બારીપાડા ગામમાં પ્રાકૃતિક ખેતીના ખેતરોની પ્રત્યક્ષ મુલાકાત લીધી

જીવામૃત, ઘનજીવામૃત અને બીજમૃતની પદ્ધતિઓનું નિરીક્ષણ કરી ખેડૂતો સાથે સીધો સંવાદ કર્યો

ડાંગ : ડાંગ જિલ્લાની મુલાકાતે પધારેલા ગુજરાત રાજ્યના કેબિનેટ મંત્રી જીતુભાઈ વાઘાણીએ ગત રોજ આહવા તાલુકાના બારીપાડા ગામે પ્રગતિશીલ ખેડૂત અનિલભાઈ સીતારામભાઈ રાઉતના ખેતરની પ્રત્યક્ષ મુલાકાત લીધી હતી. આ મુલાકાત દરમિયાન મંત્રીએ રાજ્ય સરકાર દ્વારા પ્રોત્સાહિત કરવામાં આવતી પ્રાકૃતિક ખેતીની પદ્ધતિઓનું ઝીણવટપૂર્વક નિરીક્ષણ કર્યું હતું અને ખેડૂતો સાથે સીધો સંવાદ યોજ્યો હતો. મંત્રીએ ખેડૂત દ્વારા પ્રાકૃતિક ખેતીના ભાગરૂપે તૈયાર કરવામાં આવેલ જીવામૃત, ઘનજીવામૃત અને બીજમૃતની બનાવટ તથા તેના જમીન પર થતા હકારાત્મક પ્રભાવો નિહાળ્યા હતા. ખેતરમાં અળસિયાની સક્રિયતા અને જમીનની ફળદ્રુપતા જોઈને તેમણે ખુશી વ્યક્ત કરી હતી. રાસાયણિક ખાતરો અને ઝેરી જંતુનાશકોના અતિશય વપરાશથી મુક્તિ મેળવીને જમીનની કાયાકલ્પ કરવા માટે પ્રાકૃતિક ખેતી એ આજના સમયની સૌથી મોટી આવશ્યકતા હોવાનું તેમણે જણાવ્યું હતું.

પ્રગતિશીલ ખેડૂત અનિલભાઈ સાથેની ચર્ચા દરમિયાન મંત્રીએ પ્રાકૃતિક ખેતી અપનાવવાથી ખેતીના ઉત્પાદન ખર્ચમાં શૂન્ય અથવા નહિવત ખર્ચ થતો હોવાના ફાયદાઓ વિશે ચર્ચા કરી હતી. તેમણે ઉમેર્યું હતું કે, ગાય આધારિત ખેતીથી જમીનની જળ સંગ્રહ શક્તિ વધે છે, પર્યાવરણનું રક્ષણ થાય છે અને ગ્રાહકોને ઝેરમુક્ત પૌષ્ટિક ખોરાક મળી રહે છે. રાજ્ય સરકાર દ્વારા પ્રાકૃતિક ખેતી કરતા ખેડૂતોને પ્રોત્સાહન આપવા માટે વિવિધ યોજનાઓ અમલમાં મૂકવામાં આવી છે, જેનો વ્યાપક લાભ લેવા તેમણે આહવાન કર્યું હતું.

આ મુલાકાત વેળાએ જિલ્લા વહીવટી તંત્રના અધિકારીઓ ઉપસ્થિત રહ્યા હતા. જેમાં આત્મા પ્રોજેક્ટ ડાયરેક્ટર સંજય ભગરીયા, જિલ્લા ખેતીવાડી અધિકારી બાલુભાઈ પટેલ, નાયબ ખેતી નિયામક પિયુષભાઇ ચૌધરી, નાયબ બાગાયત નિયામક તુષારભાઈ ગામિત તેમજ પ્રાકૃતિક ખેતી કરતા પ્રગતિશીલ ખેડૂતો હાજર રહીને માર્ગદર્શન મેળવ્યું હતું.