સીતા વનમાં મૂર્તિ ખંડિત મામલે પોલીસની કાર્યવાહી સામે સ્થાનિકોમાં રોષ

સ્થાનિકોની ગેરહાજરીમાં મૂર્તિની પ્રાણ પ્રતિષ્ઠા કરાવવાના પ્રયાસથી વિવાદ, ધારાસભ્યની મધ્યસ્થતા બાદ મામલો થાળે

ડાંગ : ડાંગ જિલ્લાના સુબીર તાલુકાના ઝરી ગામે આવેલા સીતા વન ખાતે થોડા દિવસો અગાઉ સીતા માતા અને હનુમાનજીની મૂર્તિઓ ખંડિત કરવામાં આવી હોવાના બનાવને લઈને સ્થાનિક આદિવાસી સમાજમાં રોષ જોવા મળી રહ્યો છે. આ ઘટનાને લઈને હવે પોલીસ પ્રશાસનની કામગીરી સામે પણ ગંભીર સવાલો ઊભા થયા છે.

મળતી માહિતી મુજબ, સ્થાનિક લોકોની ગેરહાજરીમાં પોલીસ તંત્ર દ્વારા સીતા વન ખાતે જઈને ખંડિત થયેલી મૂર્તિઓની પ્રાણ પ્રતિષ્ઠા કરવાની કાર્યવાહી શરૂ કરવામાં આવી હતી. આ અંગે સ્થાનિક લોકોને જાણ થતાં ગામના આગેવાનો અને ગ્રામજનો સ્થળ પર દોડી આવ્યા હતા. સ્થાનિક આગેવાનો અને પોલીસ વચ્ચે મૂર્તિની પ્રાણ પ્રતિષ્ઠાની પ્રક્રિયાને લઈને ભારે બોલાચાલી અને વિવાદ સર્જાયો હતો. સ્થાનિકોનો આક્ષેપ હતો કે મૂર્તિ ખંડિત કરનાર જવાબદારો સામે કાર્યવાહી કર્યા વિના પોલીસ દ્વારા પોતાની રીતે પ્રાણ પ્રતિષ્ઠા કરવાની કાર્યવાહી કરવી યોગ્ય નથી.

પરિસ્થિતિ વધુ ઉગ્ર બને તે પહેલાં ડાંગના ધારાસભ્યની મધ્યસ્થતા કરવામાં આવી હતી. ધારાસભ્ય દ્વારા પોલીસ પ્રશાસનને સ્પષ્ટપણે જણાવ્યું હોવાનું સામે આવ્યું છે કે સૌ પ્રથમ મૂર્તિ ખંડિત કરનાર આરોપીઓને ઝડપી પાડવા જોઈએ અને ત્યારબાદ સ્થાનિક આદિવાસી સમાજની પરંપરા તથા સંસ્કૃતિ મુજબ જ મૂર્તિની પ્રાણ પ્રતિષ્ઠા કરવામાં આવશે.

ધારાસભ્યની મધ્યસ્થી બાદ પોલીસ અને સ્થાનિક આગેવાનો વચ્ચેનો વિવાદ શાંત થયો હતો. ત્યારબાદ ખંડિત થયેલી મૂર્તિઓને ત્યાંથી ઉઠાવીને ગામના હનુમાન મંદિરમાં રાખવામાં આવી હતી અને સમગ્ર મામલો થાળે પડ્યો હતો.

જોકે, સીતા વન જેવી ધાર્મિક અને સાંસ્કૃતિક આસ્થાની જગ્યાએ બનેલી આ ઘટના અને ત્યારબાદ પોલીસ દ્વારા સ્થાનિકોની ગેરહાજરીમાં કરવામાં આવેલી કાર્યવાહીથી અનેક પ્રશ્નો ઊભા થયા છે. સ્થાનિકો હવે મૂર્તિ ખંડિત કરનાર શખ્સો સામે તાત્કાલિક અને કડક કાર્યવાહી થાય તેવી માંગ કરી રહ્યા છે.

સ્થાનિકોનું કહેવું છે કે આ માત્ર મૂર્તિ ખંડિત કરવાનો બનાવ નથી, પરંતુ તેમની આસ્થા, પરંપરા અને આદિવાસી સંસ્કૃતિ સાથે જોડાયેલો ગંભીર વિષય છે. તેથી સમગ્ર ઘટનાની નિષ્પક્ષ તપાસ કરી જવાબદારોને કાયદેસરની સજા અપાવવી જરૂરી છે.