રક્ષાબંધન નિમિત્તે ડાંગની 70 વિધવા અને વડીલ બહેનોને દેવમોગરા માતાજીના દર્શન કરાવાયા

એસ.એસ. માહલા કોલેજ કેમ્પસના સંચાલક શ્યામભાઈ માહલા દ્વારા સેવાભાવી પ્રવાસનું આયોજન, બહેનોએ પૂજા-અર્ચના સાથે પરંપરાગત ગરબાનો આનંદ માણ્યો

ડાંગ : રક્ષાબંધનના પવિત્ર તહેવાર નિમિત્તે ભાઈ-બહેનના પ્રેમ, લાગણી અને પવિત્ર સંબંધને સાચા અર્થમાં સેવા સાથે જોડતી એક સુંદર પહેલ સામે આવી છે.

ડાંગ જિલ્લામાં કાર્યરત એસ.એસ. માહલા કોલેજ કેમ્પસના સંચાલક શ્યામભાઈ માહલા દ્વારા ડાંગ જિલ્લાની 70 જેટલી વિધવા અને વડીલ બહેનો માટે પ્રસિદ્ધ આદિવાસી તીર્થધામ દેવમોગરા માતાજીના દર્શનનો એક વિશેષ અને યાદગાર સેવાભાવી પ્રવાસ યોજવામાં આવ્યો હતો. સામાન્ય રીતે રક્ષાબંધનનું પર્વ આશીર્વાદ અને સ્નેહનું પર્વ માનવામાં આવે છે. સમાજમાં એવી ઘણી બહેનો છે જેઓ ઘર-પરિવારની આર્થિક અને સામાજિક જવાબદારીઓને કારણે લાંબા સમયથી કોઈ ધાર્મિક સ્થળે જઈ શકી ન હતી. આ બહેનોની લાગણી સમજીને શ્યામભાઈ માહલા દ્વારા આ ખાસ પ્રવાસનું આયોજન કરવામાં આવ્યું હતું.

દેવમોગરા ખાતે પહોંચ્યા બાદ આદિવાસી પરંપરા મુજબ પૂજા અને ગરબાનું આયોજન કરતા, તમામ બહેનોએ આદિવાસી સંસ્કૃતિ અને પરંપરા અનુસાર માતાજીની પૂજા-અર્ચના કરી દર્શનનો લાભ લીધો હતો. દર્શન કર્યા બાદ મંદિરના વિશાળ પરિસરમાં બહેનો ઉત્સાહપૂર્વક પરંપરાગત ગરબા રમ્યા હતા અને આનંદની ક્ષણો માણી હતી.

આ પ્રસંગે ભાવુક બનેલી બહેનોએ જણાવ્યું હતું કે, અમે દૈનિક ઘરકામ અને પરિસ્થિતિના કારણે ક્યારેય બહાર પ્રવાસે જઈ શક્યા નથી. શ્યામભાઈના આ પ્રયાસથી આજે આપણી આરાધ્ય દેવી દેવમોગરા માતાજીના દર્શન કરવાનો લહાવો મળ્યો છે, જે અમારા માટે અત્યંત આનંદની વાત છે. દર્શન બાદ તમામ બહેનોએ શ્યામભાઈ માહલાને હૃદયપૂર્વક આશીર્વાદ પાઠવ્યા હતા અને તેઓ સમાજ માટે આવી જ રીતે સતત સેવા કાર્ય કરતા રહે તેવી પ્રાર્થના કરી હતી.

રક્ષાબંધન જેવા તહેવારને માત્ર ઉજવણી સુધી સીમિત ન રાખીને સમાજના જરૂરિયાતમંદ વર્ગ સાથે ખુશીઓ વહેંચવાનો શ્યામભાઈ માહલાનો આ પ્રયાસ સમગ્ર ડાંગ જિલ્લામાં પ્રશંસા પામી રહ્યો છે.