સેવા સંકલ્પ અભિયાન-2026 અંતર્ગત ડાંગ જિલ્લામાં સ્વૈચ્છિક રક્તદાન કેમ્પ યોજાયો

રેડક્રોસ સોસાયટી ડાંગ અને જિલ્લા આરોગ્ય શાખાના સંયુક્ત ઉપક્રમે આહવા ખાતે 33 યુનિટ રક્ત એકત્રિત

ડાંગ : સમગ્ર રાજ્યમાં 17 સપ્ટેમ્બરથી 17 ઓક્ટોબર દરમિયાન યોજાઈ રહેલા સેવા સંકલ્પ અભિયાન-2026 અંતર્ગત ડાંગ જિલ્લામાં વિવિધ સેવાલક્ષી અને જનહિતલક્ષી કાર્યક્રમોનું આયોજન કરવામાં આવી રહ્યું છે. આ અભિયાન અંતર્ગત ‘સેવા મેરા યોગદાન’ના સંકલ્પ સાથે 17 સપ્ટેમ્બરના રોજ આહવાના ડાંગ દરબાર હોલ ખાતે સ્વૈચ્છિક રક્તદાન કેમ્પ યોજાયો હતો.

ડાંગ જિલ્લા વહીવટી તંત્ર, જિલ્લા આરોગ્ય શાખા તથા રેડક્રોસ સોસાયટી ડાંગના સહયોગથી યોજાયેલા આ કેમ્પમાં ગુજરાત વિધાનસભાના નાયબ મુખ્ય દંડક અને ડાંગના ધારાસભ્ય વિજયભાઈ પટેલ, ડાંગ ભાજપના સંગઠન પ્રભારી રાજેશ દેસાઈ, પ્રમુખ કિશોરભાઈ ગાવિત, અધિક જિલ્લા આરોગ્ય અધિકારી ડો. હિમાંશુ ગામીત, સિવિલ હોસ્પિટલના અધિક્ષક ડો. મિતેશ કુનભી સહિત આરોગ્ય અધિકારીઓ અને સ્થાનિક પદાધિકારીઓ ઉપસ્થિત રહ્યા હતા.

રક્તદાન કેમ્પમાં વિવિધ ક્ષેત્રના નાગરિકો, અધિકારીઓ-કર્મચારીઓ તથા સ્વૈચ્છિક રક્તદાતાઓએ ઉત્સાહપૂર્વક ભાગ લીધો હતો. રક્તદાતાઓએ માનવસેવાના ઉમદા કાર્યમાં યોગદાન આપી ‘સેવા મેરા યોગદાન’ના સંકલ્પને સાકાર કર્યો હતો. બપોરે ત્રણ વાગ્યા સુધીમાં કુલ 33 યુનિટ રક્ત એકત્રિત કરવામાં આવ્યું હતું.

રક્તની જરૂરિયાત ધરાવતા દર્દીઓને સમયસર રક્ત ઉપલબ્ધ થાય તે માટે સ્વૈચ્છિક રક્તદાનનું વિશેષ મહત્વ હોવાનું જણાવી નાગરિકોમાં રક્તદાન પ્રત્યે જાગૃતિ અને સેવાભાવ વધે તે હેતુથી આ કેમ્પનું આયોજન કરવામાં આવ્યું હતું.

સેવા સંકલ્પ અભિયાન-2026 અંતર્ગત સમાજના દરેક વર્ગને સેવાકાર્યો સાથે જોડાવા અને પોતાની ક્ષમતા તથા સમય અનુસાર સમાજહિતમાં યોગદાન આપવા પ્રેરિત કરવામાં આવી રહ્યા છે. ડાંગ જિલ્લામાં પણ વિવિધ સેવાલક્ષી પ્રવૃત્તિઓ દ્વારા જનભાગીદારી સાથે સેવા અને સંકલ્પની ભાવનાને વધુ મજબૂત બનાવવાનો પ્રયાસ કરવામાં આવી રહ્યો છે.