સુબીરના નંદની વન બચત જૂથ દ્વારા વૈજ્ઞાનિક ઢબે મશરૂમ ઉત્પાદનનો સફળ પ્રયોગ

DRDA-NRLM યોજના થકી આદિવાસી મહિલાઓએ મશરૂમ અને સ્પોન ઉત્પાદન દ્વારા સ્વરોજગારી સાથે આર્થિક સ્વનિર્ભરતા મેળવી

ડાંગ : રાજ્ય સરકાર દ્વારા ગ્રામીણ મહિલાઓના આર્થિક સશક્તિકરણ અને સર્વાંગી વિકાસ માટે વિવિધ યોજનાઓ મારફતે પ્રોત્સાહન આપવામાં આવી રહ્યું છે. તેના ભાગરૂપે ડાંગ જિલ્લાના સુબીર ખાતે સખી મંડળની બહેનોએ આત્મનિર્ભરતાનું ઉત્તમ ઉદાહરણ પૂરું પાડ્યું છે.

જિલ્લા ગ્રામ વિકાસ એજન્સી ડાંગ-આહવા અંતર્ગત રાષ્ટ્રીય ગ્રામીણ આજીવિકા મિશન સંચાલિત નંદની વન બચત જૂથ દ્વારા વૈજ્ઞાનિક પદ્ધતિથી મશરૂમ ઉત્પાદનની સફળ પહેલ કરવામાં આવી છે. સ્વસહાય જૂથની મહિલાઓ પરંપરાગત પ્રવૃત્તિઓથી આગળ વધીને ગુણવત્તાયુક્ત મશરૂમનું ઉત્પાદન કરી રહી છે.

જૂથ દ્વારા ઉત્પાદિત મશરૂમનું સ્થાનિક બજારમાં સીધું વેચાણ કરવામાં આવે છે, જેના કારણે બહેનોને નિયમિત અને સંતોષકારક આવક મળી રહી છે. મશરૂમ ઉત્પાદન ઉપરાંત જૂથ દ્વારા મશરૂમના બિયારણ એટલે કે સ્પોનનું પણ સફળતાપૂર્વક ઉત્પાદન કરવામાં આવી રહ્યું છે.

સ્પોનના વેચાણ થકી જૂથ વધારાની આવક મેળવી રહ્યું છે. સાથે જ ડાંગ જિલ્લાના અન્ય ખેડૂતો અને મહિલાઓને પણ મશરૂમ ઉત્પાદન સાથે જોડાવા માટે પ્રેરણા અને જરૂરી તાલીમબદ્ધ સહયોગ આપવામાં આવી રહ્યો છે.

આ પ્રવૃત્તિથી જૂથ સાથે જોડાયેલી મહિલાઓ આર્થિક રીતે સક્ષમ બનવાની સાથે તેમના આત્મવિશ્વાસ અને નિર્ણયક્ષમતામાં પણ વધારો થયો છે. નંદની વન બચત જૂથની આ પહેલ મહિલા સશક્તિકરણ અને આત્મનિર્ભર ગામના સંકલ્પને સાકાર કરતી પ્રેરણાદાયી કામગીરી બની છે.