વઘઈ-સાપુતારા પોલીસ દ્વારા રૂ. 9.27 લાખથી વધુના પ્રોહિબિશન મુદ્દામાલનો નાશ

વર્ષ 2025-26ના કુલ 29 ગુનાઓમાં જપ્ત 6013 બોટલ/ટીન કોર્ટના હુકમ મુજબ નાશ કરાયા

ડાંગ : ડાંગ જિલ્લામાં ગેરકાયદેસર દારૂની હેરાફેરી અને પ્રોહિબિશન પ્રવૃત્તિઓ સામે જિલ્લા પોલીસ દ્વારા કડક કાર્યવાહી કરવામાં આવી રહી છે. તેના ભાગરૂપે વઘઈ અને સાપુતારા પોલીસ સ્ટેશન વિસ્તારમાં પ્રોહિબિશન અધિનિયમ હેઠળ નોંધાયેલા વિવિધ ગુનાઓમાં જપ્ત કરાયેલા વિદેશી દારૂ તથા બીયરના મુદ્દામાલનો કોર્ટના હુકમ મુજબ નિયમોનુસાર નાશ કરવામાં આવ્યો હતો.

સુરત વિભાગના પોલીસ મહાનિરીક્ષક પ્રેમવીરસિંહ તથા ડાંગ-આહવાના પોલીસ અધિક્ષક પ્રીતિ યાદવની સૂચના અને નાયબ પોલીસ અધિક્ષક કે.આર. ડીમરીના માર્ગદર્શન હેઠળ કાર્યવાહી હાથ ધરવામાં આવી હતી.

વઘઈ પોલીસ સ્ટેશનમાં વર્ષ 2025 અને 2026 દરમિયાન નોંધાયેલા કુલ 16 પ્રોહિબિશન ગુનાઓમાં જપ્ત કરાયેલા વિદેશી દારૂ તથા બીયરની 1513 બોટલ/ટીનનો નાશ કરવામાં આવ્યો હતો, જેની કુલ કિંમત રૂ. 2,60,602 હતી.

જ્યારે સાપુતારા પોલીસ સ્ટેશનમાં વર્ષ 2025 અને 2026 દરમિયાન નોંધાયેલા કુલ 13 પ્રોહિબિશન ગુનાઓમાં જપ્ત કરાયેલા વિદેશી દારૂ તથા બીયરની 4500 બોટલ/ટીનનો નાશ કરવામાં આવ્યો હતો, જેની કુલ કિંમત રૂ. 6,66,946 હતી.

આમ, વઘઈ અને સાપુતારા પોલીસ સ્ટેશનના મળી કુલ 29 પ્રોહિબિશન ગુનાઓના 6013 બોટલ/ટીન મુદ્દામાલનો નાશ કરવામાં આવ્યો હતો, જેની કુલ કિંમત રૂ. 9,27,548 હતી.

મુદ્દામાલ નાશની સમગ્ર કાર્યવાહી આહવા-ડાંગના સબ-ડિવિઝનલ મેજિસ્ટ્રેટ યુ.વી. પટેલના અધ્યક્ષસ્થાને યોજાઈ હતી. આ પ્રસંગે નાયબ પોલીસ અધિક્ષક કે.આર. ડીમરી, નશાબંધી અને આબકારી અધિક્ષક એ.એસ. પટેલ, વઘઈ મામલતદાર એ.જે. ચૌહાણ, વઘઈ પોલીસ ઈન્સ્પેક્ટર એ.એ. ચાવડા, સાપુતારા પોલીસ ઈન્સ્પેક્ટર જે.કે. બારીયા સહિત પોલીસ અધિકારીઓ અને કર્મચારીઓ ઉપસ્થિત રહ્યા હતા.