વઘઈની સરકારી વિનયન અને વાણિજ્ય કૉલેજમાં રાષ્ટ્રીય રમત દિવસની ઉજવણી

મેજર ધ્યાનચંદજીની જન્મજયંતિ નિમિત્તે વિદ્યાર્થીઓએ વિવિધ રમતોમાં ભાગ લીધો; રમતગમત, સ્વાસ્થ્ય અને સ્વચ્છતા અંગે પ્રતિજ્ઞા લેવાઈ

ડાંગ : સરકારી વિનયન અને વાણિજ્ય કૉલેજ, વઘઈ ખાતે હોકીના જાદુગર તરીકે ઓળખાતા મેજર ધ્યાનચંદજીની જન્મજયંતિ નિમિત્તે રાષ્ટ્રીય રમત દિવસની ઉત્સાહભેર ઉજવણી કરવામાં આવી હતી. કાર્યક્રમમાં વિદ્યાર્થીઓ અને અધ્યાપકો મોટી સંખ્યામાં જોડાયા હતા.

આ પ્રસંગે સુરત મહેસૂલ વિભાગના સ્ટેમ્પ ડેપ્યુટી અંકિતભાઈએ પોતાના જીવનસંઘર્ષના ઉદાહરણો દ્વારા વિદ્યાર્થીઓને શિક્ષણની સાથે સર્વાંગી વિકાસ માટે પ્રેરિત કર્યા હતા. કૉલેજના આચાર્ય ડૉ. જે.એમ. ભોયાએ મેજર ધ્યાનચંદજીની સિદ્ધિઓને યાદ કરી પરંપરાગત રમતોના જતન તેમજ શારીરિક અને માનસિક સ્વાસ્થ્ય માટે રમતગમતના મહત્વ વિશે માર્ગદર્શન આપ્યું હતું.

ડૉ. વિજયભાઈએ વિદ્યાર્થીઓને “મહેનતને મિત્ર બનાવો”નો સંદેશ આપ્યો હતો, જ્યારે પ્રા. રાકેશભાઈ નાયકાએ રમતગમત દ્વારા આત્મવિશ્વાસ અને એકાગ્રતા કેળવવા અંગે માર્ગદર્શન આપ્યું હતું. વિદ્યાર્થિની કુંવર સેજલે હોકી રમતના મહત્વ વિશે પોતાના વિચારો રજૂ કર્યા હતા.

કાર્યક્રમના અંતે ઉપસ્થિત 45 વિદ્યાર્થીઓ અને અધ્યાપકોએ રમતગમત, સ્વાસ્થ્ય અને સ્વચ્છતા અંગેની પ્રતિજ્ઞા લીધી હતી. ત્યારબાદ વિવિધ રમતોનું આયોજન કરવામાં આવ્યું હતું, જેમાં વિદ્યાર્થીઓએ ઉત્સાહપૂર્વક ભાગ લીધો હતો. સમગ્ર કાર્યક્રમનું આયોજન પી.ટી.આઈ. ભુપેન્દ્રભાઈ દ્વારા કરવામાં આવ્યું હતું, જ્યારે સંચાલન ડૉ. વિજયભાઈએ સંભાળ્યું હતું.