જલાલપોર તાલુકા પંચાયતની લિફ્ટ મહિના બાદ પણ બંધ, અરજદારો અને કર્મચારીઓ પરેશાન

પૂરના પાણી લિફ્ટના નીચેના ભાગમાં ભરાતા સેવા બંધ થઈ હતી; દિવ્યાંગ, વૃદ્ધ અને અશક્ત અરજદારોને દાદર ચઢવાની ફરજ

નવસારી : જલાલપોર તાલુકા પંચાયત કચેરીમાં પૂરના પાણી લિફ્ટના નીચેના ભાગમાં ભરાઈ જતા લિફ્ટ બંધ કરી દેવામાં આવી હતી. જોકે ઘટનાને લગભગ એક મહિનો વીતી ગયો હોવા છતાં લિફ્ટ ફરી શરૂ ન થતા કચેરીમાં આવતા અરજદારો તેમજ કર્મચારીઓને ભારે હાલાકીનો સામનો કરવો પડી રહ્યો છે.

અગાઉ જલાલપોર તાલુકા પંચાયતની કચેરી નવસારી જિલ્લા પંચાયત બિલ્ડિંગના ચોથા માળે કાર્યરત હતી. ત્યારબાદ દશેરા ટેકરી વિસ્તારમાં પશુ દવાખાના પાછળ નવી જલાલપોર તાલુકા પંચાયત કચેરી બનાવવામાં આવી હતી. અહીં કર્મચારીઓ અને કામ અર્થે આવતા અરજદારોની સુવિધા માટે લિફ્ટ સહિતની વ્યવસ્થા કરવામાં આવી છે.

એક મહિના અગાઉ ઉપરવાસમાં પડેલા ભારે વરસાદને કારણે નવસારીના નીચાણવાળા વિસ્તારોમાં પાણી ભરાયા હતા. સાથે જ દશેરા ટેકરી પાછળ સી.આર. પાટીલ સંકુલ પાસેથી પસાર થતી ખાડી પણ ઉભરાતા આસપાસના વિસ્તારોમાં પૂરની સ્થિતિ સર્જાઈ હતી. આ દરમિયાન જલાલપોર તાલુકા પંચાયત કચેરીની લિફ્ટના નીચેના ભાગમાં પણ પાણી ભરાઈ જતા લિફ્ટ સેવા બંધ કરવામાં આવી હતી.

તે સમયે પાણી ભરાયેલું હોવાથી લિફ્ટનું સમારકામ થઈ શક્યું નહોતું. પરંતુ હવે લગભગ એક મહિનો વીતી ગયો હોવા છતાં લિફ્ટ શરૂ કરવામાં આવી નથી. જેના કારણે તાલુકા પંચાયતના કર્મચારીઓ તેમજ વિવિધ કામ માટે આવતા અરજદારોને દાદરનો ઉપયોગ કરવો પડી રહ્યો છે.

ખાસ કરીને દિવ્યાંગ, વૃદ્ધ, મહિલાઓ અને શારીરિક રીતે અશક્ત અરજદારોને ભારે મુશ્કેલીનો સામનો કરવો પડી રહ્યો છે. આવા અરજદારોને કચેરી સુધી પહોંચવા માટે દાદર ચઢવાની ફરજ પડી રહી હોવાથી લિફ્ટનું સમારકામ કરીને તેને તાત્કાલિક શરૂ કરવાની માંગ ઉઠી રહી છે.