આદિજાતિ વિકાસ મંત્રી નરેશભાઈ પટેલના હસ્તે લાભાર્થીઓને આવાસના વહીવટી મંજૂરી હુકમો એનાયત કરાયા

હળપતિ ગૃહ નિર્માણ યોજના હેઠળ નવસારી જિલ્લાના ૬૦૫ આવાસો મંજૂર, હળપતિ પરિવારોને આવાસ નિર્માણ માટે ૧.૭૦ લાખની આર્થિક સહાય અપાઈ

નવસારી : ગુજરાત જમીન વિહોણા મજૂરો અને હળપતિ ગૃહ નિર્માણ બોર્ડ, ગાંધીનગરના સંયુક્ત ઉપક્રમે હળપતિ ગૃહ નિર્માણ યોજના અંતર્ગત નવસારી જિલ્લાના મંજૂર થયેલા આવાસોના વહીવટી મંજૂરી હુકમ (વર્ક ઓર્ડર) વિતરણ કાર્યક્રમ ચીખલીના દિનકર ભવન ખાતે આદિજાતિ વિકાસ, ખાદી, કુટિર અને ગ્રામોદ્યોગ વિભાગના મંત્રી નરેશભાઈ પટેલના અધ્યક્ષસ્થાને યોજાયો હતો.

આ અવસરે મંત્રી નરેશભાઈ પટેલે જણાવ્યું હતું કે, નવસારી જિલ્લામાં હળપતિ ગૃહ નિર્માણ યોજના હેઠળ આશરે ૬૦૫ આવાસો મંજૂર કરવામાં આવ્યા છે. લાભાર્થીઓને આવાસ નિર્માણ માટે સરકાર દ્વારા ૧,૭૦,૦૦૦ રૂપિયાની આર્થિક સહાય આપવામાં આવે છે. સરકાર દ્વારા જે હેતુસર આવાસની સહાય આપવામાં આવે છે, તે હેતુ સિદ્ધ થાય તે માટે લાભાર્થીઓએ મળતી સહાયનો યોગ્ય ઉપયોગ કરી ગુણવત્તાયુક્ત આવાસનું નિર્માણ કરવાનો અનુરોધ કર્યો હતો.

આવાસનું નિર્માણ કરતી વખતે માત્ર રહેઠાણ પૂરતું મર્યાદિત ન રહેતા બાથરૂમ અને શૌચાલય જેવી પાયાની સુવિધાઓ સાથે આવાસનું નિર્માણ થાય તેની પણ ખાસ કાળજી રાખવાની હિમાયત કરી હતી. સરકારની વિવિધ કલ્યાણકારી યોજનાઓની જાણકારી આપી તેનો મહત્તમ લાભ લેવા ઉપસ્થિત લાભાર્થીઓને અનુરોધ કર્યો હતો.

હળપતિ સમાજની નોંધપાત્ર વસ્તી સુરત, નવસારી અને વલસાડ જિલ્લામાં વસવાટ કરે છે. સરકાર દ્વારા આદિજાતિ તથા વંચિત વર્ગોના સર્વાંગી વિકાસ માટે વિવિધ આવાસ, શિક્ષણ, આરોગ્ય, રોજગાર અને સામાજિક સુરક્ષા સહિતની યોજનાઓ અમલમાં મૂકવામાં આવી રહી છે.

આ પ્રસંગે હળપતિ ગૃહ નિર્માણ બોર્ડ, ગાંધીનગરના સેજલબેન મોઢ દ્વારા હળપતિ ગૃહ નિર્માણ યોજના અંગેની વિસ્તૃત માહિતી આપવામાં આવી હતી. યોજનાના ઉદ્દેશો, લાભાર્થીઓને મળવાપાત્ર સહાય તથા આવાસ નિર્માણ અંગેની પ્રક્રિયા વિશે ઉપસ્થિતોને માહિતગાર કર્યા હતા.

આ પ્રસંગે મંત્રી નરેશભાઈ પટેલ તથા ઉપસ્થિત મહાનુભાવોના હસ્તે હળપતિ ગૃહ નિર્માણ યોજના હેઠળ મંજૂર થયેલા આવાસોના વહીવટી મંજૂરી હુકમો લાભાર્થીઓને એનાયત કરવામાં આવ્યા હતા.