નવસારીના દંડેશ્વર ગામથી માછીમારી કરવા ગયેલા પતિ ગુમ થતા પરિવારજનો ચિંતિત, એકની લાશ મળી હતી

ગુમ થયેલ પતિ જીવિત છે કે મૃત્યુ પામ્યા છે તે અંગે તપાસ કરી માહિતી આપવા પત્નીની જીલ્લા પોલીસ વડાને રજૂઆત

નવસારી : નવસારીના દંડેશ્વર ગામથી માછીમારી કરવા માટે પતિ સાથે ગયેલા અન્ય એક યુવાનની લાશ મળતા હળપતિ પરિવાર ચિંતિત અને વ્યથિત થયા છે. ત્યારે ગુમ થયેલ પતિ જીવિત છે કે મૃત્યુ પામ્યા છે તે અંગે તપાસ કરી માહિતી આપવા પત્નીએ જીલ્લા પોલીસ વડાને લેખિતમાં રજૂઆત કરી છે.

નવસારી તાલુકાના દંડેશ્વર ગામે પાદર ફળીયામાં રહેતા લતાબેન નરેશભાઈ હળપતિએ જીલ્લા પોલીસ વડાને કરેલી લેખિત રજુઆતમાં જણાવ્યું હતું કે, ગત ૨જી ઓક્ટોબરે દંડેશ્વર ગામેથી કિરણભાઈ નામનો વ્યક્તિ સતિષભાઈ મોહનભાઈ પટેલ અને નરેશભાઈ ભાણાભાઈ હળપતિને માછીમારી કરવા માટે પોતાની સાથે લઇ ગયા હતા.

ત્યારબાદ ગત 6ઠ્ઠી ઓક્ટોબરે સતિષભાઈ પટેલની લાશ દંડેશ્વર ગામ ખાતે કિરણભાઈ નામનો વ્યક્તિ મૂકી જઈ મૃતક સતિષભાઈના પરિવારજનોને ૪૫ હજાર રૂપિયા આપીને તે વ્યક્તિ ત્યાંથી જતો રહ્યો હોવાના આક્ષેપો કર્યા હતા. પરંતુ તેમની સાથે માછીમારી કરવા ગયેલા નરેશભાઈ હળપતિ અંગે હજુ સુધી કોઈ માહિતી મળી નથી.

નરેશભાઈ હાલતમાં જીવિત છે કે મૃત્યુ પામ્યા છે તે અંગે પણ પરિવારજનોને કોઈ સત્તાવાર કે વિશ્વસનીય માહિતી પ્રાપ્ત થઇ નથી. જેના કારણે પરિવારજનો અત્યંત ચિંતિત અને વ્યથિત થયા છે. આ સમગ્ર ઘટનામાં સતિષભાઈનું મૃત્યુ કેવી રીતે થયું, તેમની લાશ ત્યાં કેવી રીતે આવી, ૪૫ હજાર રૂપિયા આપવાનું કારણ શું હતું તથા નરેશભાઈ હાલમાં ક્યાં છે અને તેમની સાથે શું બન્યું છે તે સહિતના તમામ મુદ્દાઓ અંગે ગંભીર શંકા થાય છે.

જેથી ગુમ થયેલા નરેશભાઈ હળપતિની તાત્કાલિક શોધખોળ કરવા, નરેશભાઈ જીવિત છે કે મૃત્યુ પામ્યા છે તે અંગે તાત્કાલિક તપાસ કરી પરિવારજનોને સત્તાવાર માહિતી આપવા, સતિષભાઈ પટેલના મૃત્યુ અંગેની સમગ્ર ઘટનાની નિષ્પક્ષ અને ઊંડાણપૂર્વક તપાસ કરવા, કિરણભાઈ તથા તેમની સાથે સંકળાયેલા અન્ય વ્યક્તિઓની પૂછપરછ કરી સમગ્ર હકીકત બહાર લાવવાની માંગ કરવામાં આવી છે. તેમજ આ સમગ્ર ઘટનામાં જો કોઈ ગુનો બનતો હોય તો કાયદેસરની કાર્યવાહી કરવાની પણ માંગ કરી છે.