નવસારી જિલ્લા મહેસુલી કર્મચારીઓ અનિશ્ચિત મુદતની હડતાળ પર ઉતર્યા, અરજદારો અને કચેરીના ખાતાકીય કામો અટવાયા

મહેસુલી કર્મચારીઓએ કરેલી 14 માંગણીઓ પૈકી એક પણ માંગણી ન સ્વીકારતા આખરે કર્મચારીઓએ હડતાળનું રણશિંગું ફૂંક્યું

નવસારી : ગુજરાત રાજ્ય મહેસૂલી કર્મચારીઓની 14 જેટલી પડતર માંગણીઓનો સમયસર ઉકેલ ન આવતા ગુજરાત રાજ્ય મહેસૂલી કર્મચારી મહામંડળે બુધવારથી અનિશ્ચિત મુદતની હડતાળનું રણશિંગું ફૂંક્યું છે. જેથી આજથી નવસારી જિલ્લા મહેસુલી કર્મચારીઓ પણ અનિશ્ચિત મુદતની હડતાળ પર ઉતરતા અરજદારો અને કચેરીના ખાતાકીય કામો અટવાયા હતા.

મહેસુલી કર્મચારીઓના સેવા વિષયક પ્રશ્નો અને અવાસ્તવિક તેમજ બિનજરૂરી લક્ષાંક પ્રેરિત કાર્યપદ્ધતિ અને ઓનલાઈન સિસ્ટમની વિસંગતતા તથા વહીવટી અને ફિલ્ડમાં જેનું અમલીકરણ શક્ય નથી તેવી મહેસુલી કર્મચારીઓ ઉપર નાંખવામાં આવતી અન્ય વિભાગની કામગીરી અંગે મહામંડળ દ્વારા મહેસુલ વિભાગ સમક્ષ રજુઆતો કરવામાં આવી હતી. પરંતુ આ બાબતે સરકાર દ્વારા કોઈ નિર્ણય ન લેવાતા મહેસુલ વિભાગ સામે મહેસુલી કર્મચારીઓમાં રોષની લાગણી ઉભી થઇ હતી.

એક માસથી વધુ સમય વીતી ગયો હોવા છતાં વહીવટી મુદ્દા પૈકી એકપણ બાબત અંગે કોઈ નિર્ણય ન કરતા કર્મચારીઓમાં નિરાશા ફેલાઈ હતી. તેમજ એક માસના સમયગાળા દરમિયાન પણ વિભાગ કક્ષાના અધિકારીઓ દ્વારા જીલ્લા કક્ષાના અધિકારી ઉપર દબાણ ઉભુ કરી કર્મચારીઓ ઉપર વધારાની કામગીરી નાંખવા સતત પ્રયત્નો કરવામાં આવી રહ્યા હોવાના આક્ષેપો કર્યા હતા.

એક માસથી વધુનો સમય વીતી ગયો છતાં પણ સરકાર દ્વારા કોઈ નિર્ણય ન લેવામાં આવતા આખરે આજથી ગુજરાત રાજ્ય મહેસુલી કર્મચારી મંડળે અનિશ્ચિત મુદતની હડતાળ પર ઉતરવાનો નિર્ણય કર્યો છે. જેથી નવસારી જિલ્લા મહેસુલી કર્મચારીઓ અનિશ્ચિત મુદતની હડતાળ પર ઉતર્યા છે.

હડતાળની સીધી અસર હવે સામાન્ય અરજદારો પર પડી શકે છે. મામલતદાર કચેરીઓ, જનસેવા કેન્દ્રો અને ગ્રામ પંચાયત સ્તરની મહેસૂલી કામગીરી ખોરવાતા વિવિધ દાખલાઓ, જમીન સંબંધિત દસ્તાવેજો અને સરકારી સેવાઓ માટે આવતા લોકોને ધક્કા ખાવાની સ્થિતિ સર્જાઈ છે.

સરકાર અને કર્મચારીઓ વચ્ચેનો આ ટકરાવ કેટલો લાંબો ચાલે છે તે હવે મહત્વનું બન્યું છે. એક તરફ કર્મચારીઓ પોતાની 14 માંગણીઓના નિરાકરણ પર અડગ છે, તો બીજી તરફ હડતાળ લંબાશે તો તેની અસર સીધી સામાન્ય જનતા સુધી પહોંચવાની શક્યતા છે. હવે સરકાર માત્ર ખાતરી આપે છે કે ખરેખર નિર્ણય લે છે, તેના પર સમગ્ર મહેસૂલી તંત્રની નજર છે.