આહવા ICDS ખાતે પોષણ ઉત્સવ અંતર્ગત પૌષ્ટિક વાનગી સ્પર્ધા યોજાઈ

આંગણવાડી બહેનો દ્વારા પૌષ્ટિક વાનગીઓનું પ્રદર્શન; માતા-બાળ પોષણ અને સંતુલિત આહાર અંગે જાગૃતિનો સંદેશ

ડાંગ : ડાંગ જિલ્લાના મુખ્ય મથક આહવા ખાતે આવેલી ICDS કચેરીમાં પોષણ ઉત્સવ અંતર્ગત પૌષ્ટિક વાનગી સ્પર્ધાનું આયોજન કરવામાં આવ્યું હતું. કાર્યક્રમમાં આંગણવાડી બહેનો દ્વારા વિવિધ પ્રકારની પૌષ્ટિક અને સંતુલિત વાનગીઓ તૈયાર કરી તેનું પ્રદર્શન કરવામાં આવ્યું હતું.

આ પ્રસંગે તાલુકા પંચાયત પ્રમુખ વીણાબેન ગાંગુર્ડે, સામાજિક ન્યાય સમિતિના અધ્યક્ષ જિગ્નેશભાઈ સોલંકી, જિલ્લા પંચાયત સદસ્ય સ્નેહલભાઈ ઠાકરે તથા તાલુકા પંચાયત સદસ્ય રાકેશ પવાર સહિતના આગેવાનો ઉપસ્થિત રહ્યા હતા.

ઉપસ્થિત મહાનુભાવોએ વાનગીઓનું નિરીક્ષણ કરી પોષણના મહત્વ અંગે માહિતી મેળવી હતી. કાર્યક્રમ દરમિયાન સંતુલિત આહાર, માતા-બાળ પોષણ તેમજ સ્વસ્થ સમાજના નિર્માણ અંગે જાગૃતિ ફેલાવવામાં આવી હતી.

ખાસ કરીને બાળકોના સર્વાંગી વિકાસ માટે પોષણયુક્ત આહાર કેટલો મહત્વપૂર્ણ છે તે અંગે માર્ગદર્શન આપવામાં આવ્યું હતું. કાર્યક્રમ દ્વારા ‘સુપોષિત બાળક – સ્વસ્થ પરિવાર – સશક્ત સમાજ’નો સંદેશ આપવામાં આવ્યો હતો.