વઘઈ કૃષિ વિજ્ઞાન કેન્દ્ર દ્વારા ટેક્નોલોજી વીકની ઉજવણી

પ્રાકૃતિક ખેતી, મૂલ્યવર્ધન અને માર્કેટિંગ અંગે ખેડૂતોને માર્ગદર્શન; 280થી વધુ ખેડૂતોએ લીધો લાભ

ડાંગ : વઘઈ કૃષિ વિજ્ઞાન કેન્દ્ર દ્વારા ડાંગ જિલ્લાના ખેડૂતો અને મહિલાઓના કૃષિ વિકાસ માટે ટેક્નોલોજી વીક તેમજ નેશનલ મિશન નેચરલ ફાર્મિંગ અંતર્ગત તાલીમ કાર્યક્રમનું આયોજન કરવામાં આવ્યું હતું.

નવસારી કૃષિ યુનિવર્સિટીના કુલપતિ ડો. આર.એમ. નાયક, વિસ્તરણ શિક્ષણ નિયામક ડો. હેમંત શર્મા અને વઘઈ કૃષિ વિજ્ઞાન કેન્દ્રના વરિષ્ઠ વૈજ્ઞાનિક તથા વડા ડો. હર્ષદ પ્રજાપતિના માર્ગદર્શન હેઠળ કાર્યક્રમ યોજાયો હતો.

ટેક્નોલોજી વીક દરમિયાન કુલપતિ ડો. આર.એમ. નાયકે પ્રાકૃતિક ખેતી કરતા ખેડૂતોને વધુ ઉત્પાદન માટે ઉપલબ્ધ તમામ આયામોનો યોગ્ય ઉપયોગ કરવા પ્રેરિત કર્યા હતા. સાથે જ ખેડૂતોએ એકજૂથ થઈ પ્રાકૃતિક ખેત પેદાશોનું માર્કેટિંગ કરવા અને મૂલ્યવર્ધન પર ભાર મૂકવો જોઈએ તેમ જણાવ્યું હતું.

સંશોધન નિયામક ડો. ટી.આર. અહલાવતે ખેડૂતોને પ્રાકૃતિક ખેતી દ્વારા વધુ સારા પરિણામ મેળવવા માર્ગદર્શન આપ્યું હતું, જ્યારે વિસ્તરણ શિક્ષણ નિયામક ડો. એચ.આર. શર્માએ પ્રાકૃતિક કૃષિ પેદાશોના મૂલ્યવર્ધન થકી વધુ આવક મેળવવાની માહિતી આપી હતી.

ટેક્નિકલ સેશનમાં પ્રાકૃતિક ખેતીમાં રોગ અને જીવાત નિયંત્રણ અંગે ડો. એમ.ડી. ખૂંટ, ડો. ડી.એચ. ટંડેલ તથા કૃષિ વિજ્ઞાન કેન્દ્રના વૈજ્ઞાનિકોએ ખેડૂતોને માર્ગદર્શન પૂરું પાડ્યું હતું. કાર્યક્રમમાં પ્રો. જૈમિન નાયક, ડો. વી.આર. નાયક અને ડો. લલિત મહાત્મા સહિતના નિષ્ણાતો પણ ઉપસ્થિત રહ્યા હતા.

કાર્યક્રમના અંતે ખેડૂતોને જીવામૃત, બીજામૃત અને અગ્નિઅસ્ત્ર બનાવવાની પ્રાયોગિક તાલીમ આપવામાં આવી હતી. ઉપરાંત પ્રાકૃતિક ખેતી પદ્ધતિના પાંચ આયામો, વિવિધ પાકોમાં પ્રાકૃતિક કૃષિ પદ્ધતિ અને તેની ઉપયોગિતા અંગે સમજણ આપવામાં આવી હતી.

ખેડૂતોને પ્રાકૃતિક ખેતીના નિદર્શન ફાર્મની મુલાકાત પણ કરાવવામાં આવી હતી. સમગ્ર કાર્યક્રમમાં 280થી વધુ ખેડૂતોએ ભાગ લીધો હતો.