બોરખેતના જંગલમાં સાગના વૃક્ષનું ગેરકાયદે કટીંગ કરતા 3 આરોપી રંગેહાથ ઝડપાયા

સાગી પાટિયા, રંધા મશીન અને કાપેલા લાકડા સહિત કુલ અંદાજિત ₹1.30 લાખનો મુદ્દામાલ જપ્ત

ડાંગ : ડાંગ જિલ્લાના આહવા-પૂર્વ રેન્જના જંગલ વિસ્તારમાં સાગના વૃક્ષનું ગેરકાયદેસર કટીંગ કરતા ત્રણ વ્યક્તિઓને વન વિભાગની ટીમે રંગેહાથ ઝડપી પાડ્યા હતા. આ મામલે ભારતીય વન અધિનિયમ-1927 હેઠળ ગુનો નોંધી કાયદેસરની કાર્યવાહી હાથ ધરવામાં આવી છે.

દક્ષિણ ડાંગ વન વિભાગના નાયબ વન સંરક્ષક નિરજકુમાર તથા મદદનીશ વન સંરક્ષક જૈનિલ દેસાઈના માર્ગદર્શન હેઠળ આહવા-પૂર્વ રેન્જના કમ્પાર્ટમેન્ટ નં. 129ના જંગલ વિસ્તારમાં સાગના વૃક્ષનું ગેરકાયદેસર કટીંગ થતું હોવાની બાતમી સ્થાનિક વન સ્ટાફને મળી હતી.

બાતમીના આધારે વન વિભાગની ટીમે સ્થળ પર પહોંચી તપાસ કરતાં બોરખેત ખાતે રહેતા ભરતભાઈ નાનુભાઈ નિંબારે, તુકારામભાઈ નાનુભાઈ નિંબારે અને નરેન્દ્રભાઈ નાનુભાઈ નિંબારે સાગના વૃક્ષનું કટીંગ કરતા મળી આવ્યા હતા. વન વિભાગે ત્રણેયને રંગેહાથ ઝડપી તેમની સામે કાયદેસરની કાર્યવાહી હાથ ધરી હતી.

તપાસ દરમિયાન ભરતભાઈ નાનુભાઈ નિંબારેના રહેણાંક મકાનમાંથી ગેરકાયદેસર રીતે સંતાડવામાં આવેલા સાગના પાટિયા તેમજ રંધા મશીન મળી આવ્યા હતા, જેની અંદાજિત બજાર કિંમત ₹45,000 હોવાનું જણાવાયું છે.

આ ઉપરાંત કમ્પાર્ટમેન્ટ નં. 129ના જંગલ વિસ્તારમાંથી કાપવામાં આવેલા એક સાગના વૃક્ષનું કુલ ઘનફળ 2.365 ઘનમીટર હોવાનું સામે આવ્યું હતું, જેની અંદાજિત કિંમત ₹85,000 ગણવામાં આવી છે.

આમ, વન વિભાગે સાગી પાટિયા, રંધા મશીન અને કાપેલા સાગના લાકડા સહિત કુલ અંદાજિત ₹1.30 લાખનો મુદ્દામાલ જપ્ત કર્યો છે. જંગલ સંપત્તિના ગેરકાયદેસર કટીંગ સામે થયેલી આ કાર્યવાહીથી લાકડાની ગેરકાયદે હેરાફેરી કરનારાઓમાં ફફડાટ ફેલાયો છે.