આહવા મિશન પાડાની આંગણવાડી પાસે ધોવાણથી જોખમ વધ્યું

ચોમાસાના વરસાદથી પાયા આસપાસની માટી ખસી, બાળકોની સુરક્ષા માટે તાત્કાલિક મરામત અને રિટેઇનિંગ વોલની માંગ

ડાંગ : ડાંગ જિલ્લાના મુખ્ય મથક આહવા ખાતે મિશન પાડામાં આવેલી આંગણવાડીની આસપાસ ચોમાસાના વરસાદને કારણે જમીનનું ધોવાણ થતું હોવાના દૃશ્યો સામે આવ્યા છે.

મળતી તસવીરોમાં આંગણવાડીની બાજુની જમીન મોટા પ્રમાણમાં ધોવાઈ ગઈ હોવાનું જોવા મળે છે. કેટલીક જગ્યાએ ઈમારતના પાયાની આસપાસની માટી ખસી જતાં પાયો ખુલ્લો પડ્યો છે, જ્યારે દિવાલના નીચેના ભાગમાં તિરાડો અને નુકસાનના નિશાન પણ જોવા મળે છે.

ચોમાસા દરમિયાન સતત વરસાદને કારણે ધોવાણ વધુ વધે તો આંગણવાડીની ઈમારતની સલામતી અંગે ગંભીર પ્રશ્નો ઊભા થઈ શકે છે. આંગણવાડીમાં નાના બાળકો આવતા હોવાથી તેમની સુરક્ષા પણ મહત્વપૂર્ણ બની રહે છે.

સ્થાનિકો દ્વારા તંત્રનું ધ્યાન દોરી આંગણવાડીની આસપાસ તાત્કાલિક ધોવાણ અટકાવવાના પગલાં લેવા, સુરક્ષિત રિટેઇનિંગ વોલ બનાવવી તેમજ જરૂરી મરામત કામગીરી હાથ ધરવાની માંગ કરવામાં આવી રહી છે.

તંત્ર દ્વારા સમયસર યોગ્ય કામગીરી કરવામાં આવે તો ચોમાસા દરમિયાન થનારા સંભવિત વધુ નુકસાનને અટકાવી શકાય તેમ છે.