સાપુતારામાં ફૂટપાથ પર ગેરકાયદેસર કબ્જો અને બાંધકામ મુદ્દે વિધવા મહિલાઓએ મોરચો માંડ્યો

લેક ગાર્ડન નજીક જાહેર ફૂટપાથ પર દબાણનો આક્ષેપ, નોટીફાઇડ એરિયાના ચીફ ઓફિસરને લેખિત ફરિયાદ

ડાંગ : ડાંગના વિશ્વવિખ્યાત પ્રવાસન સ્થળ સાપુતારા ખાતે આવેલા સરકારી નોટીફાઇડ વિસ્તારમાં ગેરકાયદેસર કબ્જો કરી રસ્તો બંધ કરી દેવાના ગંભીર આક્ષેપો કરવામાં આવ્યા છે. લેક ગાર્ડન નજીક આવેલી જાહેર ફૂટપાથ પર ગેરકાયદેસર રીતે શેડ બનાવી દેવામાં આવતા સ્થાનિકો અને પ્રવાસીઓને મુશ્કેલીનો સામનો કરવો પડી રહ્યો છે.

મળતી માહિતી મુજબ, સાપુતારાના લેક ગાર્ડન પાસે આવેલી જાહેર ફૂટપાથ પર જાળીઓ લગાવી દબાણ કરવામાં આવ્યું છે અને ત્યાં ગેરકાયદેસર શેડ ઊભો કરાયો હોવાનો આક્ષેપ છે. આ જગ્યા પ્રવાસીઓની અવરજવર માટે મહત્વપૂર્ણ હોવા છતાં ફૂટપાથ બંધ કરી આ જગ્યા એક વ્યક્તિને હોટેલ અને રેસ્ટોરન્ટ ચલાવવા માટે ભાડે આપી દેવામાં આવી હોવાનો પણ આક્ષેપ કરવામાં આવ્યો છે.

આ ગેરકાયદેસર બાંધકામ અને દબાણના મુદ્દે નવાગામની વિધવા મહિલાઓમાં ભારે રોષ જોવા મળ્યો હતો. રોષે ભરાયેલી મહિલાઓ મોરચો લઈને સ્થળ પર પહોંચી હતી અને ચાલી રહેલું ગેરકાયદેસર કામ તાત્કાલિક ધોરણે બંધ કરાવ્યું હતું.

મહિલાઓએ આ મામલે સાપુતારા નોટીફાઇડ એરિયાના ચીફ ઓફિસર કલ્પના ચૌધરીને લેખિતમાં ફરિયાદ કરી છે. ફરિયાદમાં જણાવ્યા મુજબ, જાહેર ફૂટપાથ પર જાળીઓ લગાવી દેવાને કારણે સાપુતારા આવતા પ્રવાસીઓને ચાલીને જવામાં મોટો અવરોધ ઊભો થઈ રહ્યો છે.

મહિલાઓએ તંત્ર સમક્ષ તાત્કાલિક હસ્તક્ષેપ કરવાની માંગ કરી છે. સાથે જ ચાલી રહેલું ગેરકાયદેસર બાંધકામ કાયમી ધોરણે અટકાવવામાં આવે તેમજ સરકારી જમીન અને જાહેર ફૂટપાથ પરથી દબાણ દૂર કરી રસ્તો પ્રવાસીઓ માટે ફરી ખુલ્લો કરવામાં આવે તેવી માંગણી કરવામાં આવી છે.