વઘઈ સરકારી વિનયન અને વાણિજ્ય કોલેજ ખાતે વિકાસ સપ્તાહ–2026નો પ્રારંભ

વિદ્યાર્થીઓ અને સ્ટાફે સામૂહિક સ્વચ્છતા શપથ લીધા, પ્લાસ્ટિક મુક્ત ભારતના નિર્માણનો સંકલ્પ કર્યો

ડાંગ : વઘઈની સરકારી વિનયન અને વાણિજ્ય કોલેજ ખાતે “સ્વચ્છતા સાથે વિકાસની દિશામાં એક કદમ” સૂત્ર હેઠળ ગત રોજ વિકાસ સપ્તાહ–2026નો પ્રારંભ કરવામાં આવ્યો હતો. જેમાં સ્વચ્છતા શપથ, સ્વચ્છતા ઝુંબેશ અંગે માર્ગદર્શન તેમજ ગુજરાતની વિકાસયાત્રા પર વિશેષ વ્યાખ્યાનનું આયોજન કરવામાં આવ્યું હતું.

આ કાર્યક્રમમાં આચાર્ય ડૉ. જે. એમ. ભોયાએ સ્વચ્છતાના વાસ્તવિક અર્થને સ્પષ્ટ કરતાં જણાવ્યું હતું કે, સ્વચ્છતા માત્ર બાહ્ય સફાઈ કે પરિસર પૂરતી મર્યાદિત બાબત નથી, પરંતુ જીવનના તમામ ક્ષેત્રોમાં તેનું આગવું મહત્વ છે. સ્વચ્છતા એક ઉચ્ચ નૈતિક ગુણ છે, જેમાં જાગૃતિ, શ્રેષ્ઠ આદતો અને પ્રામાણિકતા સમાયેલી છે. તેમણે વિદ્યાર્થીઓને દૈનિક જીવનમાં સિંગલ-યુઝ પ્લાસ્ટિકનો ઉપયોગ બંધ કરી પ્લાસ્ટિક મુક્ત ભારતના અભિયાનમાં સક્રિયપણે જોડાવા પ્રેરક આહ્વાન કર્યું હતું.

“ગુજરાતની વિકાસયાત્રા” વિષય પર વ્યાખ્યાન આપતાં પ્રા. લક્ષ્મીબેન ગાયકવાડે વિકસિત ભારત–2047ના સંદર્ભમાં જણાવ્યું હતું કે, કોઈપણ પ્રદેશ કે દેશની ખરી પ્રગતિ તેના માનવ વિકાસ અને સજાગ નાગરિકો પર નિર્ભર છે. તેમણે ગુજરાત રાજ્ય દ્વારા હાંસલ કરાયેલી વિવિધ સિદ્ધિઓ અને જનકલ્યાણકારી યોજનાઓની માહિતી આપી હતી. તેમજ 2047ના આત્મનિર્ભર ભારતના સ્વપ્નને સાકાર કરવામાં આજના યુવાવર્ગનું યોગદાન સૌથી પાયારૂપ સાબિત થશે તેમ જણાવ્યું હતું.

આ પ્રસંગે કોલેજના તમામ અધ્યાપકો તેમજ વિદ્યાર્થીઓએ સ્વચ્છ અને હરિયાળા વાતાવરણના નિર્માણ માટે સામૂહિક સ્વચ્છતા શપથ ગ્રહણ કર્યા હતા. સમગ્ર કાર્યક્રમનું આયોજન અને સંચાલન વિકાસ સપ્તાહના નોડલ ઓફિસર ડૉ. પ્રીતિબેન તથા સાથી અધ્યાપકો દ્વારા સફળતાપૂર્વક કરવામાં આવ્યું હતું.