આહવામાં દહીં હાંડીની ઉજવણીમાં પુષ્પા અને શેખાવતના હમશકલ કલાકારોએ મચાવી ધૂમ

ડીજેના તાલે યુવાનો ઝૂમ્યા, પુષ્પા-શેખાવતના ડાયલોગ અને ગીતોથી મુખ્ય બજારમાં જામ્યો ઉત્સવનો માહોલ

ડાંગ : ડાંગ જિલ્લાના મુખ્ય મથક આહવા ખાતે દહીં હાંડીની ઉજવણી રંગારંગ માહોલમાં કરવામાં આવી હતી. આહવાના મુખ્ય બજારમાં યોજાયેલા કાર્યક્રમમાં ફિલ્મી પાત્રો પુષ્પા અને શેખાવતના હમશકલ કલાકારો ખાસ આકર્ષણનું કેન્દ્ર બન્યા હતા. હમશકલ કલાકારોની હાજરીથી યુવાનોમાં ભારે ઉત્સાહ જોવા મળ્યો હતો.

આ કાર્યક્રમનું આયોજન ૐ શેષ ગ્રૂપ અને આહવા ગ્રામ પંચાયતના સરપંચ હરીરામ સાવંત દ્વારા કરવામાં આવ્યું હતું. કાર્યક્રમમાં મુખ્ય મહેમાન તરીકે ડાંગના ધારાસભ્ય તથા રાજ્યના મુખ્ય દંડક વિજયભાઈ પટેલ તેમજ માજી ધારાસભ્ય મંગળભાઈ ગાવિત ઉપસ્થિત રહ્યા હતા.

દહીં હાંડીના કાર્યક્રમ દરમિયાન ડીજેની ધૂન પર પુષ્પા ફિલ્મના લોકપ્રિય ડાયલોગ અને ગીતો રજૂ કરવામાં આવતા યુવાનો મન મૂકીને ઝૂમી ઉઠ્યા હતા. પુષ્પા અને શેખાવતના હમશકલ કલાકારોની એન્ટ્રી થતાં જ સમગ્ર કાર્યક્રમ સ્થળે ઉત્સાહનો માહોલ છવાઈ ગયો હતો.

આહવાના મુખ્ય બજારમાં અંદાજે બે કલાક સુધી ડાન્સ અને સંગીતનો માહોલ જામ્યો હતો. ડીજેના તાલે યુવાનો મન મૂકીને નાચ્યા હતા, જેના કારણે મુખ્ય બજાર ઉત્સવના રંગે રંગાઈ ગયું હતું. ડાંગ જિલ્લાના વિવિધ વિસ્તારોમાંથી આવેલા યુવાનો તેમજ મોટી સંખ્યામાં નગરજનો દહીં હાંડીની ઉજવણીમાં જોડાયા હતા.

હમશકલ કલાકારોના અભિનય, પુષ્પા ફિલ્મના સંવાદો અને ગીતોએ કાર્યક્રમમાં ચાર ચાંદ લગાવી દીધા હતા. સમગ્ર કાર્યક્રમ દરમિયાન યુવાનોમાં ભારે ઉત્સાહ જોવા મળ્યો હતો અને આહવા શહેરમાં દહીં હાંડીની ઉજવણીનો અનોખો માહોલ સર્જાયો હતો. પરંપરાગત દહીં હાંડીની ઉજવણી સાથે ફિલ્મી પાત્રોની રજૂઆત અને સંગીત-ડાન્સના કાર્યક્રમથી આહવામાં યોજાયેલી ઉજવણી યાદગાર બની હતી.