જન્મદિવસની અનોખી ઉજવણી : સેવાધામના 70 જરૂરિયાતમંદ બાળકોને ભોજન અને કપડાંનું વિતર

સુરતના અભિષેક પટેલે પુત્રના જન્મદિવસને સમાજસેવા સાથે જોડ્યો, બાળકોના ચહેરા પર ખુશી છવાઈ

ડાંગ : ડાંગ જિલ્લાના મુખ્ય મથક આહવા ખાતે આવેલા સેવાધામ હોસ્ટેલમાં સુરતથી આવેલા અભિષેક તુલસીભાઈ પટેલ (આંબલા ગામ) દ્વારા પોતાના પુત્રના જન્મદિવસની અનોખી અને સેવાભાવી રીતે ઉજવણી કરવામાં આવી હતી.

જન્મદિવસની ઉજવણી નિમિત્તે અભિષેકભાઈ પટેલે સેવાધામ હોસ્ટેલમાં રહેતા આશરે 70 જરૂરિયાતમંદ બાળકોને ભોજન કરાવ્યું તેમજ કપડાંનું વિતરણ કર્યું હતું. બાળકો સાથે ખુશીની પળો વિતાવી તેમણે જન્મદિવસને માત્ર પોતાના પરિવાર પૂરતો સીમિત ન રાખી સમાજસેવાના કાર્ય સાથે જોડ્યો હતો.

આ પ્રસંગે બાળકોના ચહેરા પર ખુશી જોવા મળી હતી. અભિષેકભાઈની આ પહેલે સમાજમાં જન્મદિવસની ઉજવણી સેવા, સહયોગ અને જરૂરિયાતમંદોની મદદ સાથે કરવાની પ્રેરણા પૂરી પાડી છે.

જન્મદિવસની સાચી ખુશી ત્યારે જ સાર્થક બને છે, જ્યારે આપણી ખુશીમાં જરૂરિયાતમંદના ચહેરા પર પણ સ્મિત આવે. અભિષેકભાઈ પટેલની આ સેવાભાવી પહેલને સેવાધામ પરિવાર તેમજ ઉપસ્થિત લોકોએ પ્રશંસનીય ગણાવી હતી.