ડાંગ જિલ્લા માટે ગૌરવની ક્ષણ : કલ્પનાબેન મહાલાને રાજ્યનો શ્રેષ્ઠ શિક્ષક એવોર્ડ

ગાંધીનગર ખાતે શિક્ષક દિન નિમિત્તે મુખ્યમંત્રી ભૂપેન્દ્રભાઈ પટેલ અને રાજ્યપાલ આચાર્ય દેવવ્રતના હસ્તે સન્માન

ડાંગ : શિક્ષક દિન નિમિત્તે ડાંગ જિલ્લા માટે ગૌરવની ક્ષણ સર્જાઈ છે. આહવા તાલુકાની ગોંદલવિહિર પ્રાથમિક શાળાના શિક્ષિકા કલ્પનાબેન મહાલાને શિક્ષણ ક્ષેત્રે ઉત્કૃષ્ટ કામગીરી બદલ રાજ્ય કક્ષાના શ્રેષ્ઠ શિક્ષક એવોર્ડથી સન્માનિત કરવામાં આવ્યા હતા.

ગાંધીનગર ખાતે યોજાયેલા રાજ્ય કક્ષાના શિક્ષક સન્માન સમારોહમાં કલ્પનાબેન મહાલાને ગુજરાતના મુખ્યમંત્રી ભૂપેન્દ્રભાઈ પટેલ અને મહામહિમ રાજ્યપાલ આચાર્ય દેવવ્રતના હસ્તે એવોર્ડ તથા પ્રશસ્તિપત્ર અર્પણ કરવામાં આવ્યું હતું.

કલ્પનાબેન મહાલાની શિક્ષણ ક્ષેત્રે નિષ્ઠા, વિદ્યાર્થીઓ પ્રત્યેની સમર્પિત સેવા અને શૈક્ષણિક કામગીરીની નોંધ લઈ તેમને રાજ્ય કક્ષાએ આ પ્રતિષ્ઠિત સન્માન મળ્યું છે. તેમના આ સન્માનથી ગોંદલવિહિર પ્રાથમિક શાળા, આહવા તેમજ સમગ્ર ડાંગ જિલ્લામાં આનંદ અને ગૌરવની લાગણી જોવા મળી રહી છે.

ડાંગની શિક્ષિકા કલ્પનાબેન મહાલાને રાજ્યનો શ્રેષ્ઠ શિક્ષક એવોર્ડ મળતા ડાંગ જિલ્લાનું નામ રાજ્યકક્ષાએ રોશન થયું છે.