ડાંગ જિલ્લાની તમામ 100 ગ્રામ પંચાયતોમાં સઘન સફાઈ ઝુંબેશ હાથ ધરાઈ

વઘઈ અંબામાતા મંદિર ખાતે શ્રમદાન સાથે વૃક્ષારોપણ, આહવા-સુબીરમાં પણ વ્યાપક લોકભાગીદારી

ડાંગ : ગુજરાત સરકારના સામાન્ય વહીવટ વિભાગ દ્વારા રાજ્યના નાગરિકોની સુખાકારી, પર્યાવરણ સંતુલન અને જળ સુરક્ષા સુનિશ્ચિત કરવાના હેતુથી દર મહિનાના પ્રથમ રવિવારે ‘સઘન સફાઈ ઝુંબેશ’, ‘કેચ ધ રેઈન’ અને ‘વૃક્ષારોપણ તથા સુકાયેલ રોપાઓની ફેરબદલી’ અંતર્ગત ત્રિવિધ કાર્યક્રમનું આયોજન કરવાની સૂચના આપવામાં આવી છે. જેના ભાગરૂપે સમગ્ર ડાંગ જિલ્લામાં વ્યાપક લોકભાગીદારી સાથે મહા સફાઈ ઝુંબેશ હાથ ધરવામાં આવી હતી.

આ અભિયાનના ભાગરૂપે વઘઈ સ્થિત પવિત્ર અંબામાતા મંદિર ખાતે ગુજરાત વિધાનસભાના નાયબ મુખ્ય દંડક વિજયભાઈ પટેલના અધ્યક્ષ સ્થાને વિશેષ સફાઈ અભિયાન યોજાયું હતું. જેમાં વઘઈ તાલુકા પંચાયત પ્રમુખ શકુંતલાબેન પાડવી સહિતના તાલુકા સદસ્યો, નાયબ જિલ્લા વિકાસ અધિકારી હિરલભાઈ પટેલ સહિતના અધિકારીઓ, સ્થાનિક આગેવાનો અને ગ્રામજનોએ મંદિર પરિસરમાં હાથમાં ઝાડુ પકડી સામૂહિક શ્રમદાન કર્યું હતું અને જાહેર જનતાને સ્વચ્છતા જાળવવાનો સંદેશ આપ્યો હતો.

આ સાથે જ ‘એક પેડ મા કે નામ 3.0 અભિયાન’ અંતર્ગત વૃક્ષારોપણ પણ કરવામાં આવ્યું હતું.

આહવા અને સુબીર તાલુકામાં પણ તાલુકા પંચાયત પ્રમુખશ્રીઓ તેમજ ગ્રામ્ય સ્તરે સફાઈ કર્મીઓ, સ્વસહાય જૂથો, સામાજિક અગ્રણીઓ અને ગ્રામજનો ઉત્સાહપૂર્વક જોડાયા હતા. જાહેર માર્ગો, ધાર્મિક સ્થળો, સરકારી કચેરીઓ અને શાળા પરિસરોની સફાઈ કરી સમગ્ર જિલ્લામાં સ્વચ્છતા અને પર્યાવરણ સંરક્ષણનો સંદેશ આપવામાં આવ્યો હતો.