આહવામાં હેટ સ્પીચના આક્ષેપ સાથે કલેક્ટરને આવેદનપત્ર

ભારત આદિવાસી સંવિધાન સેના ડાંગ દ્વારા યશોદા દીદી સામે તપાસ અને કાયદેસરની કાર્યવાહી કરવાની માંગ

ડાંગ : ડાંગ જિલ્લામાં સીતાવન, ઝરી/વાડયાવન અને સુબીર ખાતે મૂર્તિઓ ખંડિત કરવાના બનાવને લઈને 31 ઓગસ્ટે કલેક્ટર કચેરી ખાતે યોજાયેલા કાર્યક્રમ દરમિયાન કથિત ઉશ્કેરણીજનક નિવેદન કરવામાં આવ્યું હોવાના આક્ષેપ સાથે ભારત આદિવાસી સંવિધાન સેના દ્વારા ડાંગ જિલ્લા કલેક્ટર અને જિલ્લા મેજિસ્ટ્રેટને આવેદનપત્ર પાઠવવામાં આવ્યું છે.

ભારત આદિવાસી સંવિધાન સેનાના ડાંગ જિલ્લા પ્રમુખ નિલેશભાઈ એસ. ઝાંબરે દ્વારા 7 સપ્ટેમ્બર, 2026ના રોજ આપવામાં આવેલા આવેદનપત્રમાં આક્ષેપ કરવામાં આવ્યો છે કે સાધ્વી યશોદા દીદી દ્વારા 31 ઓગસ્ટના કાર્યક્રમ દરમિયાન ખ્રિસ્તી અને મુસ્લિમ સમાજને નિશાન બનાવતું કથિત ઉશ્કેરણીજનક ભાષણ કરવામાં આવ્યું હતું.

આવેદનપત્ર મુજબ, મૂર્તિ ખંડિત કરવાની ઘટનાના આરોપીની તાત્કાલિક ધરપકડ કરવામાં નહીં આવે તો ડાંગમાં ચર્ચ અને મસ્જિદો રહેવા નહીં દેવાની વાત કરવામાં આવી હોવાનો આક્ષેપ કરવામાં આવ્યો છે. સંગઠને આવા કથિત નિવેદનને શાંતિ, એકતા અને સામાજિક સૌહાર્દ માટે નુકસાનકારક ગણાવી તેની તપાસ કરવાની માંગ કરી છે.

સંગઠને જણાવ્યું છે કે મૂર્તિ ખંડિત કરવાની ઘટનાના જવાબદાર વ્યક્તિ સામે કાયદેસરની કાર્યવાહી થવી જોઈએ, પરંતુ કોઈપણ ધર્મના લોકો કે ધાર્મિક સ્થળોને નિશાન બનાવતા નિવેદનો સામે પણ કાયદા મુજબ પગલાં લેવાં જરૂરી છે.

આવેદનપત્રમાં કથિત નિવેદન અંગે બીએનએસની કલમ 196 અને 299 હેઠળ તપાસ કરી હેટ સ્પીચ બદલ યશોદા દીદી સામે ગુનો નોંધી કાયદેસરની કાર્યવાહી કરવાની માંગ કરવામાં આવી છે. સાથે જ ડાંગ જિલ્લામાં તમામ સમાજના લોકો વચ્ચે શાંતિ, ભાઈચારો અને એકતા જળવાઈ રહે તે માટે વહીવટી તંત્ર યોગ્ય પગલાં ભરે તેવી અપીલ પણ કરવામાં આવી છે.