વાયદુન પ્રાથમિક શાળામાં ઈકો-ફ્રેન્ડલી જન્માષ્ટમીની અનોખી ઉજવણી

બાળકોને સીડ બોલ બનાવવાની તાલીમ સાથે પર્યાવરણ સંરક્ષણ અને વૃક્ષારોપણનો સંદેશ અપાયો

ડાંગ : ડાંગ જિલ્લાના આહવા તાલુકાના પૂર્ણા નદીના કાંઠે વસેલા વાયદુન ગામની પ્રાથમિક શાળામાં બાળકો સાથે ઈકો-ફ્રેન્ડલી રીતે જન્માષ્ટમી પર્વની અનોખી ઉજવણી કરવામાં આવી હતી. જન્માષ્ટમીની ઉજવણી સાથે બાળકોમાં પર્યાવરણ પ્રત્યે જાગૃતિ આવે તેવા વિવિધ સંદેશાઓ આપવામાં આવ્યા હતા.

આ પ્રસંગે પર્યાવરણ પ્રેમી વિજેશભાઈ ગામીત દ્વારા શાળાના બાળકોને પ્રકૃતિ શિક્ષણ આપવામાં આવ્યું હતું. બાળકોને પર્યાવરણનું મહત્વ સમજાવી સીડ બોલ બનાવવાની પ્રક્રિયા તથા તેના વાવેતર અંગે માર્ગદર્શન આપવામાં આવ્યું હતું. વૃક્ષોનું વાવેતર કરી પ્રકૃતિનું જતન અને પર્યાવરણનું સંરક્ષણ કરવા માટે બાળકોને પ્રેરણા આપવામાં આવી હતી.

પરંપરાગત જન્માષ્ટમી પર્વની ઉજવણીને પર્યાવરણ સંરક્ષણ સાથે જોડીને ઉજવવામાં આવતા બાળકોમાં પણ ઉત્સાહ જોવા મળ્યો હતો. પ્રકૃતિ સાથે જોડાયેલી આવી પ્રવૃત્તિઓથી બાળકોમાં વૃક્ષો અને પર્યાવરણ પ્રત્યે પ્રેમ તથા જવાબદારીની ભાવના વિકસે તેવો પ્રયાસ કરવામાં આવ્યો હતો.

આ કાર્યક્રમમાં શાળાના શિક્ષકો નિલેશભાઈ એલ. ચૌધરી, તૃપ્તિબેન ડી. ગવળી, હીનાબેન આઈ. પટેલ, રાજુભાઈ એસ. પટેલ, જીગ્નેશભાઈ આર. પાડવી તેમજ એસ.એમ.સી.ના સભ્યો ઉપસ્થિત રહ્યા હતા. અંતે શાળાના આચાર્ય યોગેશભાઈ જી. ગાયકવાડે કાર્યક્રમમાં ઉપસ્થિત સૌનો આભાર વ્યક્ત કર્યો હતો.