ડાંગમાં સીતાવન ઘટના મુદ્દે સમગ્ર ખ્રિસ્તી સમાજ સંગઠનનું કલેક્ટરને આવેદન

કથિત ઉશ્કેરણીજનક નિવેદનો સામે કાયદેસરની કાર્યવાહી, નિષ્પક્ષ તપાસ અને જિલ્લામાં શાંતિ-ભાઈચારો જળવાઈ રહે તેવી માંગ

ડાંગ : ડાંગ જિલ્લાના સુબીર તાલુકાના ઝરી તથા વાડયાવન ગામની વચ્ચે આવેલા સીતાવન ખાતે બનેલી ઘટનાને લઈને સમગ્ર ખ્રિસ્તી સમાજ સંગઠન દ્વારા સોમવારે ડાંગ જિલ્લા કલેક્ટર તથા જિલ્લા મેજિસ્ટ્રેટને આવેદનપત્ર પાઠવવામાં આવ્યું હતું. આવેદનપત્રમાં સંગઠને ઘટનાને લઈને દુઃખ વ્યક્ત કરી જણાવ્યું હતું કે, જે કોઈ વ્યક્તિ જવાબદાર હોય તેની સામે કાયદેસરની કાર્યવાહી થવી જોઈએ.

સંગઠનના જણાવ્યા મુજબ, ગત 31 ઓગસ્ટના રોજ કેટલાક હિન્દુ સંગઠનો દ્વારા કલેક્ટર કચેરી ખાતે આવેદનપત્ર આપવામાં આવ્યું હતું. આ દરમિયાન એક સાધ્વી દ્વારા કરવામાં આવેલા કથિત ઉશ્કેરણીજનક ભાષણમાં સમગ્ર ખ્રિસ્તી સમાજને નિશાન બનાવવામાં આવ્યો હોવાનો આક્ષેપ કરવામાં આવ્યો છે. ડાંગ જિલ્લામાં આવેલા ચર્ચોને લઈને કથિત ધમકીઓ આપવામાં આવી હોવાનો પણ આવેદનપત્રમાં ઉલ્લેખ કરવામાં આવ્યો છે.

ખ્રિસ્તી સમાજ સંગઠને આવા નિવેદનો સામે વિરોધ નોંધાવી ધાર્મિક લાગણી અને આસ્થાને ઠેસ પહોંચાડનાર તથા સમાજમાં ભયનું વાતાવરણ ઊભું કરનાર જવાબદારો સામે કાયદેસરની કાર્યવાહી કરવાની પ્રશાસન સમક્ષ માંગ કરી છે.

આવેદનપત્રમાં વધુમાં જણાવાયું છે કે, ડાંગ જિલ્લાની પ્રજા શાંતિપ્રિય છે અને વિવિધ ધર્મના લોકો વર્ષોથી પરસ્પર ભાઈચારાની લાગણી સાથે રહે છે. ધાર્મિક વિખવાદ ઊભો કરી જિલ્લાની શાંતિ ડહોળવાનો પ્રયાસ ન થાય તે માટે પ્રશાસન સતર્ક રહે તેવી માંગ કરવામાં આવી છે.

સંગઠને સંબંધિત વ્યક્તિઓ તથા સંગઠનો દ્વારા કરવામાં આવેલા કથિત ઉશ્કેરણીજનક નિવેદનો અંગે કાયદાની જોગવાઈઓ મુજબ કાર્યવાહી કરવા તેમજ સુપ્રીમ કોર્ટની માર્ગદર્શિકા અનુસાર યોગ્ય પગલાં લેવા અપીલ કરી છે. સાથે જ ધાર્મિક લાગણીને ઠેસ પહોંચાડનારા નિવેદનો અંગે જાહેરમાં માફી માંગવાની માંગ પણ કરવામાં આવી છે.

સમગ્ર મામલે પ્રશાસન દ્વારા નિષ્પક્ષ તપાસ કરી યોગ્ય ન્યાય આપવામાં આવે તેવી માંગ સાથે સંગઠને આહવા ખાતે આવેદનપત્ર પાઠવ્યું હતું.