આહવામાં વ્યવસાય વેરો, કચરો અને દબાણ સહિતના મુદ્દે વેપારીઓની બેઠક યોજાઈ

જાહેર ટોયલેટ, હાટ બજાર, ટ્રાફિક અને દબાણના પ્રશ્નો અંગે વેપારીઓની રજૂઆત; તંત્ર સાથે નિરાકરણ માટે ચર્ચા

ડાંગ : ડાંગ જિલ્લાના મુખ્ય મથક આહવા ખાતે વેપારીઓની મહત્વપૂર્ણ બેઠક યોજાઈ હતી. આ બેઠકમાં આહવા ગ્રામ પંચાયતના સરપંચ હરીરામભાઈ સાવંત, તાલુકા વિકાસ અધિકારી આર.બી. ચૌધરી તેમજ તલાટી કમ મંત્રી પ્રશાંતભાઈની ઉપસ્થિતિમાં શહેરના વેપારીઓ સાથે વિવિધ સ્થાનિક પ્રશ્નો અંગે ચર્ચા કરવામાં આવી હતી.

બેઠક દરમિયાન દુકાનોના વ્યવસાય વેરાની આકારણી કરી વેરો વસૂલવા તેમજ દુકાનોની આગળ કચરો ન થાય અને સ્વચ્છતા જળવાઈ રહે તે માટે યોગ્ય વ્યવસ્થા કરવા અંગે ચર્ચા કરવામાં આવી હતી. આ ઉપરાંત વેપારીઓ દ્વારા જાહેર ટોયલેટની સુવિધા, હાટ બજારની વ્યવસ્થા તેમજ સરદાર બજાર વિસ્તારમાં દુકાનોની આગળના ભાગમાં અને મુખ્ય માર્ગ પર થતા દબાણ અંગે રજૂઆતો કરવામાં આવી હતી.

મુખ્ય માર્ગ અને રસ્તા પર બેસીને વેપાર કરતા વેપારીઓને કાયમી દુકાન કે યોગ્ય વ્યવસ્થા મળી રહે તે અંગે પણ તંત્ર સમક્ષ રજૂઆત કરવામાં આવી હતી. વેપારીઓએ શહેરમાં ટ્રાફિકની સમસ્યા અને જાહેર માર્ગ પરના દબાણને કારણે નાગરિકોને પડતી મુશ્કેલીઓ તરફ તંત્રનું ધ્યાન દોર્યું હતું.

બેઠક દરમિયાન વેપારીઓ દ્વારા રજૂ કરવામાં આવેલા વિવિધ પ્રશ્નો સાંભળી તેમના યોગ્ય નિરાકરણ માટે જરૂરી કાર્યવાહી અંગે ચર્ચા કરવામાં આવી હતી. સાથે જ આહવા શહેરના વિકાસ અને વ્યવસ્થામાં વેપારીઓ તથા સ્થાનિક તંત્ર વચ્ચે વધુ સારું સંકલન રહે તે અંગે ભાર મૂકવામાં આવ્યો હતો.

આ બેઠકમાં આહવા નગરના મોટી સંખ્યામાં વેપારીઓ ઉપસ્થિત રહી પોતાના પ્રશ્નો અને સૂચનો રજૂ કર્યા હતા. વેપારીઓ અને તંત્ર વચ્ચે યોજાયેલી આ બેઠકને શહેરની વિવિધ સમસ્યાઓના નિરાકરણની દિશામાં મહત્વપૂર્ણ પહેલ તરીકે જોવામાં આવી રહી છે.