આહવામાં શિક્ષક દિન નિમિત્તે શિક્ષક સમારોહ યોજાયો

ધારાસભ્ય વિજયભાઈ પટેલ, કલેક્ટર એન.ડી. પરમાર અને શિક્ષણ અધિકારી જીગ્નેશ ત્રિવેદીની ઉપસ્થિતિમાં શ્રેષ્ઠ શિક્ષકોનું સન્માન

ડાંગ : ડાંગ જિલ્લાના મુખ્ય મથક આહવા ખાતે આવેલી સરકારી માધ્યમિક અને ઉચ્ચતર માધ્યમિક શાળામાં શિક્ષક દિન નિમિત્તે શિક્ષક સમારોહનું આયોજન કરવામાં આવ્યું હતું. સમારોહમાં ડાંગના ધારાસભ્ય વિજયભાઈ પટેલ, ડાંગ જિલ્લા કલેક્ટર એન.ડી. પરમાર, જિલ્લા શિક્ષણ અધિકારી જીગ્નેશ ત્રિવેદી સહિત શિક્ષકો અને શિક્ષણ વિભાગના પ્રતિનિધિઓ ઉપસ્થિત રહ્યા હતા.

આ પ્રસંગે જિલ્લા કલેક્ટર એન.ડી. પરમારે વિદ્યાર્થીઓ સાથે સંવાદ સાધી એક તાસ લઈ શિક્ષકની ભૂમિકા નિભાવી હતી. તેમણે વિદ્યાર્થીઓને અભ્યાસનું મહત્વ, શિક્ષણ દ્વારા જીવનમાં આગળ વધવાની તકો તેમજ સારા ભવિષ્ય માટે જરૂરી માર્ગદર્શન આપ્યું હતું.

સમારોહ દરમિયાન વર્ષ 2026ના શ્રેષ્ઠ શિક્ષક એવોર્ડ માટે પસંદગી પામેલા શિક્ષકોનું સન્માન કરવામાં આવ્યું હતું. તાલુકા અને જિલ્લા કક્ષાએ શિક્ષણ ક્ષેત્રે ઉત્કૃષ્ટ કામગીરી કરનાર શિક્ષકોને એવોર્ડ આપી સન્માનિત કરવામાં આવ્યા હતા.

આહવા તાલુકા કક્ષાના શ્રેષ્ઠ શિક્ષક એવોર્ડથી અનીતાકુમારી સોમાભાઈ આહીર, ઉપ શિક્ષક, પ્રાથમિક શાળા ગાવઠાન (કડમાળ), તા. આહવાને સન્માનિત કરવામાં આવ્યા હતા.

જિલ્લા કક્ષાના શ્રેષ્ઠ શિક્ષક એવોર્ડ માટે ત્રણ શિક્ષકોની પસંદગી કરવામાં આવી હતી. જેમાં હેતલબેન કરશનભાઈ પટેલ, ઉપ શિક્ષક, પ્રાથમિક શાળા આંબાપાડા, તા. આહવાને પ્રાથમિક વિભાગમાં; રીનાબેન બંકુભાઈ કોકણી, મદદનીશ શિક્ષક, જનતા હાઈસ્કૂલ શામગહાન, તા. આહવાને માધ્યમિક વિભાગમાં અને અંકુર ગુલાબભાઈ ગામીત, મદદનીશ, સરકારી માધ્યમિક અને ઉચ્ચતર માધ્યમિક શાળા, આહવાને ઉચ્ચતર માધ્યમિક વિભાગમાં સન્માનિત કરવામાં આવ્યા હતા.

મહાનુભાવોના હસ્તે તમામ શ્રેષ્ઠ શિક્ષકોને એવોર્ડ અર્પણ કરી અભિનંદન પાઠવવામાં આવ્યા હતા. શિક્ષક દિનના આ સમારોહમાં શિક્ષણ ક્ષેત્રે શિક્ષકોના મહત્વપૂર્ણ યોગદાનને બિરદાવવામાં આવ્યું હતું.

સમારોહ દરમિયાન શિક્ષકોને પ્રોત્સાહિત કરતાં જણાવાયું હતું કે શિક્ષક માત્ર જ્ઞાન આપવાનું કાર્ય કરતા નથી, પરંતુ વિદ્યાર્થીઓના જીવનને ઘડવામાં અને તેમના ભવિષ્યના નિર્માણમાં પણ મહત્વપૂર્ણ ભૂમિકા ભજવે છે. કાર્યક્રમથી શિક્ષકોમાં નવી ઉર્જા અને પ્રેરણાનો સંચાર થયો હતો.