આહવામાં વીજ લાઇન સાથે ચેડા કરતા વીજ પુરવઠો ખોરવાયો

અજાણ્યા ઈસમોની કરતૂતથી સિવિલ હોસ્પિટલ સહિતના વિસ્તારમાં અંધારપટ

ડાંગ : ડાંગ જિલ્લાના મુખ્ય મથક આહવા ખાતે રાત્રિના સમયે અજાણ્યા ઈસમો દ્વારા વીજ પુરવઠાની લાઇન સાથે ચેડા કરવામાં આવતા થોડા સમય માટે વીજળી બંધ થઈ હતી. આ બનાવને પગલે દક્ષિણ ગુજરાત વીજ કંપની લિમિટેડ દ્વારા પોલીસ ફરિયાદ કરવામાં આવી હોવાનું જાણવા મળ્યું છે.

મળતી માહિતી મુજબ, આહવા ખાતે ટ્રાન્સફોર્મર સેન્ટરના ફ્યુઝ બોક્સમાંથી ફ્યુઝ કાઢીને ફેંકી દેવામાં આવ્યા હતા. ઉપરાંત વેરિયસ કોલોની, ખેતીવાડી કોલોની તેમજ 11 કેવીની મુખ્ય લાઇનના પૂર્વ રેન્જ ઓફિસ નજીક આવેલી સ્વીચ સાથે પણ ચેડાં કરવામાં આવ્યા હતા. આ કારણે સિવિલ હોસ્પિટલની આગળના વિસ્તાર, ખેતીવાડી કોલોની અને વેરિયસ કોલોનીમાં વીજ પુરવઠો ખોરવાયો હતો. રાત્રે આશરે 8:45 વાગ્યેથી 9:15 વાગ્યાની વચ્ચે અજાણ્યા ઈસમો દ્વારા આ કૃત્ય કરવામાં આવ્યું હોવાનું પ્રાથમિક માહિતીમાં સામે આવ્યું છે.

વીજ પુરવઠો બંધ થયાની જાણ થતાં દક્ષિણ ગુજરાત વીજ કંપની લિમિટેડની આહવા પેટા વિભાગીય કચેરીના કર્મચારીઓ તાત્કાલિક સ્થળ પર પહોંચ્યા હતા અને કામગીરી હાથ ધરી વીજ પુરવઠો રાબેતા મુજબ શરૂ કર્યો હતો.

આ સમગ્ર બનાવ અંગે આહવા પેટા વિભાગીય કચેરીના નાયબ ઈજનેર દ્વારા આહવા પોલીસ સ્ટેશનમાં ફરિયાદ આપવામાં આવી હોવાનું જાણવા મળ્યું છે. પોલીસે સમગ્ર મામલે તપાસ હાથ ધરી વીજ લાઇન સાથે ચેડાં કરનાર અજાણ્યા ઈસમોની શોધખોળ શરૂ કરી છે.